اپنے مسلمان ہونے پر فخر ہے اداکارہ حمائمہ ملک

PESHAWAR:
اداکارہ حمائمہ ملک نے والدہ اور بھائی فیروز خان کے ساتھ عمرہ ادا کرلیا جب کہ ان کا کہنا ہے کہ اپنے مسلمان ہونے پر فخر ہے۔

اداکارہ حمائمہ ملک نے پاکستانی ڈراموں سے شہرت حاصل کی جس کے بعد انہوں نے 2014 میں بھارتی فلم نگری میں فلم ''راجہ نٹول لال'' کے ذریعے قسمت آزمائی کی جب کہ فلم باکس آفس پر بزنس کرنے میں ناکام رہی لیکن پاکستانی اداکارہ کی اداکاری کو خوب سراہا گیا تاہم گزشتہ دنوں بالی ووڈ اداکارہ اہلخانہ کے ساتھ روحانی سفر پر موجود تھیں جس میں انہوں نے عمرہ کی ادائیگی کی۔

ان دنوں اداکارہ حمائمہ ملک اپنی والدہ اور بھائی فیروز خان کے ساتھ عمرے کی ادائیگی کے لیے مکہ مکرمہ میں موجود ہیں جہاں انہوں نے عمرہ ادا کیا۔ عمرے کی ادائیگی کے بعدسماجی رابطے کی ویب سائٹ ٹوئٹر پر اللہ کا شکر ادا کرتے ہوئے حمائمہ ملک کا کہنا تھا کہ عمرہ ادا کرتے ہوئے دل مطمئن اور ایک جادوئی احساس ہوتا ہے اور اس کی نعمتوں پر شکر کرنے کے ساتھ ساتھ اپنے مسلمان ہونے پر فخر محسوس ہوتا ہے۔

واضح رہے کہ اداکارہ حمائمہ ملک نے ''عشق جنون دیوانگی''،''تنویر فاطمہ (بی اے)'' اور''اکبری اصغری'' جیسے مشہور ڈراموں میں اداکاری کے جوہر دکھائے ہیں۔