ہالی ووڈ اداکار اینٹن یلچن اپنی ہی کار کے نیچے دب کر ہلاک

امریکی فلمیں بنانے والی کمپنی اسٹار ٹریک کی فلموں میں کام کرنے والے نوجوان اداکار اینٹن یلچن کار حادثے میں ہلاک ہو گئے۔

غیر ملکی خبر رساں ادارے کے مطابق سائنس فکشن فلموں میں کام کرنے والے 27 سالہ نوجوان اداکار اینٹن یلچن لاس اینجلس میں اپنی رہائش گاہ کے باہر گاڑی میں سوار ہونے لگے تو اس دوران گاڑی ڈھلوان سطح سے سرک کر پیچھے کی جانب جانے لگی جسے روکنے کے لیے اداکار اسے پیچھے کی طرف سے روکنے لگے لیکن گاڑی انہیں تیز رفتاری سے اپنے ساتھ دھکیلتے ہوئے لے پیچھے گئی اور اس طرح وہ حفاظتی دیوار اور گاڑی کے درمیان دب گئے اور موقع پر ہی ہلاک ہوگئے۔


پولیس حکام کا کہنا ہے اینٹن یلچن کے دوست نے بتایا کہ اداکار اس سے ملنے جارہے تھے جہاں انہوں نے ریہرسل کرنا تھی لیکن اداکار سے رابطہ نہ ہونے پر ان کے دوست خود رہائش گاہ پہنچے تو وہاں انہوں نے اینٹن کو گاڑی کے پیچھے دبے ہوئے مردہ پایا۔

واضح رہے کہ آنجہانی اداکار اینٹن یلچن نے 2009 میں ریلیز ہونے والی فلم ''اسٹار ٹیک'' سے شہرت حاصل کی تھی اور اپنے فنی کیرئیر میں متعدد فلموں میں اداکاری کے جوہر دکھائے ہیں۔