مارشل لالگا کرکراچی کواسلحے سے پاک کیا جاسکتا ہے مشرف

آل پاکستان مسلم لیگ کے سربراہ پرویزمشرف نے کہاہے کہ کراچی کواسلحے سے پاک کرنے کامسئلہ مارشل لاکے نفاذکے ساتھ حل کیا جاسکتا ہے۔

اس سلسلے میں سپریم کورٹ اور حکومت،فوج کی بھرپورحمایت کرے ۔ہفتے کواے پی ایم ایل سیکریٹریٹ سے جاری بیان کے مطابق ایک ٹی وی شومیں گفتگوکرتے ہوئے انھوں نے تجویزپیش کی کہ کراچی میں فوج کے ایک لیفٹیننٹ جنرل کومارشل لا ایڈمنسٹریٹرکے طورپرلگایاجاناچاہیے۔




فوج کے جنرل ایکٹ کے تحت رینجرآرمی کے ما تحت ہے اس لیے آپریشن میں فوج سامنے نہ آئے بلکہ رینجرزشہرکواسلحہ سے پاک کرے۔پرویزمشرف نے کہاکہ کراچی کواسلحے سے پاک کرنے کیلیے بلاتفریق کارروائی لازمی ہے۔



مشکل کام کیلیے سیاسی جماعتیں مکمل غیرجانبدار ہو جائیں،میرااشارہ کسی بھی جماعت کی طرف نہیں بلکہ انتہا پسندمذہبی منافرت پھیلانے والے عناصرکی طرف ہے جواپنی جڑیں کراچی میں پھیلاچکے ہیں اورجن کی وجہ سے روشنیوں کے شہرمیں اندھیرا چھایاہواہے۔