چوہدری نثار رات کو محبت دن میں نفرت کرتے ہیں منظور وسان

سندھ کے وزیر تجارت و صنعت منظور وسان کا کہنا ہے کہ ایسا لگتا ہے کہ چوہدری نثار رات کو محبت دن میں نفرت کرتے ہیں۔

کراچی میڈیا سے بات کرتے ہوئے منظور وسان کا کہنا تھا کہ ہم لائن سے نہیں اترے یہ کام تو چوہدریوں کا ہے، انہیں نہیں لگتا چوہدری صاحب میاں صاحب سے محبت کرتے ہیں، ایسا لگتا ہے کہ وہ رات کو محبت دن میں نفرت کرتے ہیں، معلوم نہیں وہ کس کےاشارے پر کام کررہے ہیں۔


منظور وسان نے کہا کہ وزیراعلی متحرک ہو جائیں تو وزراء بھی متحرک ہو جاتے ہیں، مرادعلی شاہ کے وزیراعلیٰ بننے پر دیگر صوبوں کےلوگ حیران ہیں، پنجاب اور خیبر پختون خوا سے فون آرہے ہیں سندھ میں کیسے تبدیلی آگئی۔

خوابوں والی سرکار کے نام سے شہرت حاصل کرنے والے صوبائی وزیر کا کہنا تھا کہ پاکستان میں ہمارا ووٹ بینک بڑھ رہا ہے، 2018 کا سال پیپلز پارٹی کی جیت کا سال ہے، آئندہ انتخابات میں سندھ میں نہیں پورے پاکستان میں جیتیں گے۔ پنجاب میں پیپلز پارٹی کو موقع ملا تو سندھ کی طرح ترقی دلائیں گے۔