رنبیر کے بعد انیل کپور بھی ہم جنس پرستوں کے حامی نکلے

انیل کپور کا کہنا ہے کہ بھارتی ناظرین ہم جنس پرستوں کے درمیان محبت کو دیکھنے کے لیے پوری طرح سے تیار ہیں کیونکہ یہ اب ایک حقیقت اور معاشرے کا حصہ ہے۔

انیل کپور جو ان دنوں فلموں کی بجائے ٹی وی پر ڈراموں میں اپنی قسمت آزمائی کررہے ہیں اور بھارتی عوام کی جانب سے انہیں کافی پذیرائی بھی مل رہی ہے جس کے باعث انہوں نے مشہور امریکی ٹی وی شوز 'ماڈرن فیملی' اور 'پریژن بریک' کے حقوق حاصل کرلیے ہیں۔ ایک انٹریو کے دوران انیل کپور کا کہنا تھا اس میں کوئی شک نہیں کہ اب ٹی وی کا مستقبل روشن ہے کیونکہ لوگ لیپ ٹاپ اور موبائل پراسی طرح کے ٹی وی شوز دیکھنا پسند کرتے ہیں۔


اس خبر کو بھی پڑھیں : رنبیر کپور ہم جنس پرست کا کردار ادا کرنے کیلئے بے تاب

جب انیل کپور سے امریکی ٹی وی شو 'ماڈرن فیملی' کے بارے میں سوال کیا گیا تو اداکار کا کہنا تھا کہ بھارتی ناظرین ہم جنس پرستوں کے درمیان محبت کو دیکھنے کے لیے پوری طرح سے تیار ہیں کیونکہ یہ اب ایک حقیقت اور معاشرے کا حصہ ہے۔ ان کا کہنا تھا کہ لوگوں نے حقیقتوں کو قبول کرنا شروع کردیا ہے کیونکہ ہر کہانی معاشرے کا حصہ ہوتی ہے۔