ورون دھون کی جذباتی مناظر کی عکس بندی کیلئے شراب نوشی

بالی ووڈ کے ابھرتے ہوئے سپر اسٹار ورون دھون نے فلم ''بدری ناتھ کی دلہنیا'' میں جذباتی مناظر کی عکس بندی کے لیے شراب نوشی کی۔



بالی ووڈ میں بعض اداکار اپنے کردار میں حقیقت کا رنگ بھرنے کے لیے کچھ بھی کر گزرنے کو تیار رہتے ہیں جس میں پہلا نام مسٹر پرفیکشنسٹ عامر خان کا ہے جنہوں نے اپنے کرداروں کو حقیقی رنگ دینے کے لیے اپنی صحت تک کو داؤ پر لگا دیا تھا لیکن اب ایک اور نوجوان اداکار نے فلم میں مناظر کو حقیقت کا رنگ دینے کے لیے شراب نوشی کرڈالی۔




بھارتی میڈیا رپورٹس کے مطابق نوجوان اداکار ورون دھون فلم نگری کی پارٹیوں میں بھی شراب نوشی سے گریز کرتے ہیں لیکن اب انہوں نے اپنی نئی آنے والی فلم ''بدری ناتھ کی دلہنیا'' میں اداکارہ عالیہ بھٹ کے ساتھ جذباتی مناظر کو حقیقت کا رنگ دینے کے لیے شراب نوشی کر ڈالی اور پہلی بار میں ہی پر فیکٹ منظر عکس بند کرایا جس پر ہدایتکار ششانک کیتھن نے بھی حیرانی کا اظہار کیا۔



واضح رہے کہ فلم ''بدری ناتھ کی دلہنیا'' 2014 میں ریلیز ہونے والی ''ہمپٹی شرما کی دلہنیا'' کا سیکوئل ہے جس میں ورن دھون اورعالیہ بھٹ مرکزی کردار ادا کررہے ہیں جو آئندہ برس مارچ میں ریلیز کی جائے گی۔