آئندہ انتخابات میں کوئی جعلی ووٹ نہیں ڈال سکے گاوزیراعظم

وزیر اعظم راجہ پرویز اشرف نے کہا ہے کہ آئندہ انتخابات شفاف ہوں گے اب کوئی جعلی ووٹ نہیں ڈال سکے گا ۔

اسلام آباد میں گوجر خان سے تعلق رکھنے والے پارٹی کارکنوں سے خطاب کے دوران وزیر اعظم کا کہنا تھا کہ جسٹس ریٹائرڈ فخر الدین جی ابراہیم کی چیف الیکشن کمشنر کی حیثیت سے تقرری اور جعلی ووٹوں سے پاک ووٹرز لسٹ کی تیاری اس بات کا ثبوت ہے کہ آئندہ عام انتخابات شفاف اور غیر جانبدارانہ ہوں گے۔ ان کا کہنا تھا کہ صرف گوجر خان سے ایک لاکھ 21 ہزار جعلی ووٹ نکالے گئے۔

وزیر اعظم کا کہنا تھا کہ سستی روٹی اسکیم اور لیپ ٹاپ کی تقسیم جیسے متنازعہ منصوبوں کے بجائے حکومت نے بینظیر انکم سپورٹ پروگرام شروع کیاجسے بین الاقوامی سطح پر پزیرائی ملی۔ ماضی میں کسی حکومت نے اتنا ترقیاتی کام نہیں کیا جتنا موجودہ اتحادی حکومت نے کیا ہے اور یہ سب صدر آصف زرداری کے باعث ممکن ہوا ہے۔