کاٹ بی ہائنڈ پر کوہلی اور جوناتھن ٹروٹ میں گرما گرمی

بھارتی کرکٹر ویرت کوہلی اور انگلش بیٹسمین جوناتھن ٹروٹ کے درمیان سخت جملوں کا تبادلہ ہوا۔


یہ ناخوشگوار واقعہ اس وقت پیش آیا جب انگلش بیٹسمین 43 کے انفرادی اسکور پر تھے اور ان کی ٹیم کا مجموعہ 3وکٹ پر 123رنز تھا، ٹروٹ نے میزبان فاسٹ بولر ایشانت شرما کی شارٹ ڈلیوری کو کٹ کرنے کی کوشش کی، جس میں وہ ناکام رہے اور گیند وکٹ کیپر مہندرا سنگھ دھونی کے پاس چلی گئی، بھارتی کپتان نے گیند کو اچھال کر کیچ تھامنے کی پرزور اپیل کی، لیکن امپائر کمار دھرماسینا نے بھارتی کپتان اور ان کے پلیئرز کی اپیل کو مسترد کردیا۔

جس کے بعد کوہلی دوڑتے ہوئے انگلش بیٹسمین ٹروٹ کی جانب گئے، جہاں پر دونوں کھلاڑیوں کے درمیان سخت جملوں کا تبادلہ ہوا، جس پر لیگ اسکوائر پر موجود امپائر روڈ ٹکر نے مہندرا سنگھ دھونی کو بلاکر اس معاملے پر بات کی، تاہم ٹی وی ری پلے سے بھی واضح نہیں ہورہا تھا کہ گیند جوناتھن ٹروٹ کے بیٹ کو چھوکر گزری تھی یا نہیں، اس سے قبل انگلش کپتان الیسٹرکک بھی 13 کے انفرادی اسکور پر ایشون کی گیند مہندرا سنگھ دھونی کے ہاتھوں کیچ قرار دیے جانے کے باوجود وکٹ پر کھڑے رہے تھے۔