بلاول عمران خان بننے کی کوشش نہ کریں ورنہ کہیں کے نہیں رہیں گے سعد رفیق

وزیرریلوے خواجہ سعد رفیق کا کہنا ہے کہ بلاول عمران خان بننے کی کوشش نہ کریں ورنہ کہیں کے نہیں رہیں گے۔

کراچی میں میڈیا سے بات کرتے ہوئے وزیر ریلوے خواجہ سعد رفیق نے کہا کہ بلاول بھٹو عمران خان بننے کی کوشش نہ کریں اس سے آپ نہ ادھر کے رہیں گے نہ ادھر کے۔ انہوں نے کہا کہ کسی پر تنقید سے پہلے اپنی چارپائی کے نیچے دیکھیں، بلاول کسی کے باپ کا نام نہ لیں، آپ نے کراچی کو کھنڈر بنا دیا ہے اس لیے کراچی سمیت سندھ بھر پر توجہ دیں اور وزیراعلیٰ مراد علی شاہ کو کام کرنے دیں۔


خواجہ سعد رفیق نے بلاول بھٹو کو مخاطب کرتے ہوئے کہا کہ آپ تقریریں لکھنے والوں کی باتوں میں نہ آئیں، ڈیڑھ سال میں سندھ کے لیے کچھ کریں، پنجاب تو پیپلزپارٹی کا گڑھ تھا اپنی کرتوتوں پر نظر ڈالیں، اگر حالات ایسے رہے تو آپ کا مکمل خاتمہ نہ ہوجائے۔ انہوں نے کہا کہ پیپلزپارٹی نے ریڈ لائن کراس کی تو ہم بھی کریں گے اور ہم انہیں سوئس اکاؤنٹ بھی بھولنے نہیں دیں گے۔

وزیر ریلوے کا کہنا تھا کہ دھرنے والے دوست سے کہوں گا ان کا کراچی میں کوئی مستقبل نہیں آپ خیبرپختونخوا پر توجہ دیں، عمران خان خیبرپختونخوا میں کام کریں اور الیکشن کی تیاری کریں۔ سعد رفیق نے کہا کہ جو شہر بند کرنے کی بات کرتے تھے وہ کہاں گئے اس لیے جو شہر لاک ڈاؤن کرے گا اس سے ان کی سیاست لاک ڈاؤن ہوجائے گی، تحریک انصاف کا دھرنا ٹو بھی جمہوریت کے خلاف سازش تھی۔