بھارت میں فلم کی شوٹنگ کےدوران ایکشن اسٹنٹ کرتے ہوئے 2 اداکار ہلاک

بھارت کی مقامی فلم نگری میں فلم کی شوٹنگ کے دوران ایکشن اسٹنٹ کرتے ہوئے 2 اداکار ڈوب کر ہلاک ہوگئے۔

ہالی ووڈ فلموں میں ایکشن اسٹنٹ کرنا معمول بن گیا ہے لیکن اسٹنٹ کرنا اتنا ہی دشوار ہے جس کے دوران کئی اداکار اور اسٹنٹ مین جان سے بھی ہاتھ دھو بیٹھتے ہیں لیکن اب بھارت کی مقامی فلم نگری کننڈا میں بھی ایکشن اسٹنٹ کرتے ہوئے 2 اداکار جان سے گزر گئے۔


میڈیا رپورٹس کے مطابق بھارتی مقامی فلم ''مستی گدی'' کی شوٹنگ کے دوران ایکشن اسٹنٹ کرتے ہوئے اداکاروں دنیا وجے، انیل اور اودے نے ہیلی کاپٹر کے ذریعے ڈیم میں چھلانگ لگائی لیکن لائف جیکٹ نہ ہونے پر تینوں اداکار ڈوب گئے۔ ریسکیو اداروں نے انتھک جدوجہد کے بعد فلم کے ہیرو کو بچا لیا جب کہ باقی ڈوبنے والے دونوں اداکاروں کو مقامی انتظامیہ نے مردہ قرار دے دیا جن کی لاشوں کی تلاش کا کام جاری ہے۔

https://www.youtube.com/watch?v=2ujTS6EE0A8

دوسری جانب دونوں اداکاروں کے ایکشن اسٹنٹ کرتے ہوئے لائف جیکٹ نہ پہننے پر فلمی حلقوں نے خطرناک اسٹنٹ کرنے اور خطرات سے بچاؤ کی احتیاطی تدابیر نہ کرنے پر شدید غم و غصے کا اظہار کیا ہے جب کہ سوشل میڈیا پر بھی دونوں اداکاروں کی موت نے نئی بحث چھیڑ دی ہے۔