جنید جمشید کو دارالعلوم کراچی میں سپرد خاک کر دیا گیا

طیارہ حادثے میں جاں بحق ہونے والے معروف نعت خواں اور مبلغ جنید جمشید کے جسد خاکی کو دارالعلوم کراچی میں سپرد خاک کر دیا گیا ہے۔



ایکسپریس نیوز کے مطابق طیارہ حادثے میں جاں بحق ہونے والے معروف نعت خواں اور مبلغ جنید جمشید کی تدفین ان کی خواہش کے مطابق دارالعلوم کراچی کے قبرستان میں کر دی گئی ہے۔ جنید جمشید کی تدفین کے موقع پر ان کے اہل خانہ اور قریبی ساتھیوں سمیت بڑی تعداد میں عوام نے شرکت کی۔





قبل ازیں جنید جمشید کی نماز جنازہ معین خان اکیڈمی سے متصل گراؤنڈ میں ادا کی گئی، جنید جمشید کی نماز جنازہ معروف عالم دین مولانا طارق جمیل نے پڑھائی جس میں جید علمائے کرام، سابق قومی کرکٹرز اور شوبز ستاروں سمیت اہم سیاسی و سماجی شخصیات نے شرکت کی۔ جنید جمشید کی نماز جنازہ سے قبل مولانا طارق جمیل نے بیان بھی کیا جس میں انہوں نے دنیا و آخرت کے اہم پہلوؤں پر روشنی ڈالی۔



جنید جمشید کی نماز جنازہ کے موقع پر سیکیورٹی کے بھی انتہائی سخت انتظامات کئے گئے تھے، گراؤنڈ کے اندر اور باہر پولیس اور رینجرز کی بھاری نفری کو تعینات کیا گیا جب کہ گراؤنڈ کو بم ڈسپوزل اسکواڈ اور سراغ رساں کتوں کی مدد سے بھی سرچ کیا گیا۔

اس خبر کو بھی پڑھیں : جنید جمشید دوسری غیرسرکاری شخصیت ہیں جنھیں گارڈ آف آنر دیا گیا






دوسری جانب لاہورکےعسکری گراؤنڈ میں جنید جمشید کی اہلیہ نیہا کی نمازجنازہ ادا کر دی گئی جب کہ ان کی تدفین کیولری گراؤنڈ قبرستان میں گئی، اس موقع پر نیہا جمشید کے اہل خانہ اور رشتہ داروں سمیت لوگوں کی بڑی تعداد نے شرکت کی۔



گزشتہ روز جنید جمشید سمیت طیارہ حادثے میں جاں بحق دیگر افراد کی نور خان ایئربیس پر نماز جنازہ ادا کی گئی جس کے بعد جنید جمشید کی میت سی ون 30 طیارے کے ذریعے فیصل بیس کراچی پہنچائی گئی تھی۔



اس خبر کو بھی پڑھیں : مسافرطیارہ گرکر تباہ، جنید جمشید سمیت 47 افراد جاں بحق

واضح رہے کہ چند روز قبل چترال سے اسلام آباد جانے والی پی آئی اے کی پرواز ایبٹ آباد میں حویلیاں کے قریب گر کر تباہ ہوگئی جس سے معروف نعت خواں جنید جمشید، ان کی اہلیہ، ڈپٹی کمشنر چترال، ان کی اہلیہ، بیٹی اور3 غیرملکیوں سمیت 47 افراد جاں بحق ہوگئے تھے۔

https://www.dailymotion.com/video/x55cecg