دہشت گرد اور ان کے سہولت کار پاک دھرتی کا ناسور ہیں شہباز شریف

وزیراعلیٰ پنجاب شہباز شریف کا کہنا ہے کہ دہشت گرد اور ان کے سہولت کار پاک دھرتی کا ناسور ہیں جب کہ پاکستان نے لازوال قربانیاں دے کر اقوام عالم میں ایک نئی تاریخ رقم کی ہے۔

وزیراعلیٰ پنجاب شہباز شریف سے کور کمانڈر لاہور لیفٹیننٹ جنرل صادق علی نے ملاقات کی جس میں شہباز شریف اور کور کمانڈر لاہور نے ملک میں دہشت گردی کے حالیہ واقعات کی شدید مذمت اور شہداء کے لواحقین کے ساتھ دلی ہمدردی اور اظہار تعزیت کی۔ اس موقع پر شہبازشریف کا کہنا تھا کہ اپنا آج ملک و قوم کے کل کے لیے قربان کرنے والے پوری قوم کے ہیرو ہیں اور قوم کو شہداء کی لازوال قربانیوں پر ناز ہے، شہداء کی عظیم قربانیاں رائیگاں نہیں جائیں گی، دہشت گردی کے خلاف جنگ میں پاکستان نے لازوال قربانیاں دے کر اقوام عالم میں ایک نئی تاریخ رقم کی ہے۔


اس خبر کو بھی پڑھیں : سانحہ مال روڈ کا سہولت کار30 روزہ ریمانڈ پر سی ٹی ڈی کے حوالے

شہباز شریف نے کہا کہ دہشت گرد اور ان کے سہولت کار پاک دھرتی کا ناسور ہیں تاہم پاکستان کو امن کا گہوارہ بنانے کے لیے سب نے مل کر اپنا بھرپور کردار ادا کرنا ہے جب کہ پاکستان کی بہادر مسلح افواج ہر قسم کے چیلنج کا مقابلہ کرنے کی بھرپور صلاحیت رکھتی ہے۔