سنجھورو میں ڈیڑھ سالہ بچی خسرے سے جاں بحق

سنجھورو میں خسرہ کے مرض پر قابو نہ پایا جاسکا ایک اور بچی زندگی کی بازی ہار گئی۔

جبکہ جھوک شریف میں بھی خسرہ معصوم بچوں کو اپنا شکار بنانے لگا ہے۔ سنجھورو میں خسرہ کے مرض پر ابھی تک قابو نہ پایا جاسکا، خسرہ کے باعث ڈیڑھ سالہ کرینہ بنت ڈیو جی انتقال کر گئی جبکہ اس ہی خاندان کی 2 بچیاں پہلے ہی خسرے کے باعث فوت ہو چکی ہیں۔ دوسری جانب جھوک شریف سمیت گائوں والی دل، جلالانی، عیسیٰ ناریجو، خاصخیلی ولیج جتوئی ولیج، سکندر شورو، وسولو جو اور ولیج سمیت مختلف علاقوں میں خسرے کی وبا تیزی سے پھیل چکی ہے جسکے باعث کئی معصوم بچے اس موذی مرض کا شکار ہو گئے ہیں۔




محکمہ صحت کی جانب سے دیہاتوں اور قصبوں میں اس بیماری کی ویکسین نہ کرانے کے باعث بیماری تیزی سے بچوں کو اپنی لپیٹ میں لے رہی ہے۔ جبکہ ہسپتالوں میں سہولیات نہ ہونے کے باعث خسرے میں مبتلا بچوں کو بغیر علاج کے واپس گھروں کو بھیج رہے ہیں۔ دوسری جانب رابطہ کرنے پر محکمہ صحت کے ڈسڑکٹ آفیسر خالد قریشی نے بتایا کہ اس مسئلے سے میرا کوئی بھی تعلق نہیں ہے۔ اور نہ ہی ان کیسوں کیلیے کوئی موقف دینے کا پا بند ہوں۔