ٹاپ 10 میں جگہ بچوں کا کھیل نہیں فیڈرر کا ٹومک پر طنز

سوئس اسٹار روجر فیڈررنے ٹینس کی دنیا میں ابھرتے ہوئے آسٹریلین اسٹار برنارڈ ٹومک کو خبردار کیا ہے کہ ٹاپ 10میں شامل ہونا کوئی آسان کھیل نہیں ہے ۔

ٹومک کو جنھوں نے گزشتہ ہفتے کو سڈنی انٹرنیشنل فائنل میں 36ویں پوزیشن یافتہ کیون اینڈرسن کو, 6-3 6-3, 6-7 (2/7) سے ہراکر پہلا اے ٹی پی ٹور ٹائٹل جیتا تھا یقین ہے کہ وہ اس سال کے آخر تک ٹاپ ٹین کھلاڑیوں میں شامل ہوجائیں گے۔ لیکن 17مرتبہ گرینڈ سلم چیمپیئن فیڈرران سے متفق نہیں ہیں ۔ سوئس عظیم کھلاڑی کا کہنا ہے کہ میں سمجھتا ہوں ہمیں درجہ بدرجہ آگے بڑھنا چاہیے۔


ہر کھلاڑی تیزی سے اوپر آنا چاہتا ہے، اگرچہ وہ رینکنگ میں 60ویں پوزیشن پر ہے لیکن وہ ایک ہی سال میں اپنے آپ کو دسویں پوزیشن پردیکھنا چاہتا ہے، یہ بہت مشکل ہے، ٹاپ 10 تک پہنچنے کے لیے بہت جدوجہد کرنا ہوتی ہے، یہ نہ بھولیں کہ ٹاپ ٹین کھلاڑی کتنی مشکلات عبور کرکے اس مقام تک پہنچے ہیں۔ واضح رہے کہ ٹومک آسٹریلین اوپن میں بہتر کھیل پیش کرکے 43ویں پوزیشن پر پہنچ چکے ہیں، انھیںکامیابی کی صورت میں تیسرے راؤنڈ میں فیڈرر کا سامنا کرنا پڑ سکتا ہے۔

ٹومک کو کورٹ سے باہر بھی کئی مسائل کا سامنا کرنا پڑاجس میں گزشتہ جنوری میں آسٹریلین اوپن کے چوتھے راؤنڈ میں پہنچنے کے کچھ دنوں بعد ہی تیز رفتاری پر پولیس کارروائی اور اکتوبر میں اپنے دوست کی سالگرہ کے موقع پراس سے جھگڑے کے بارے میں اخبارات کی سرخیوں میں ان کا نام آیا۔

ٹومک کا کہنا ہیکہ میں نے ان غلطیوں سے بہت کچھ سیکھ لیا ہے، زندگی میں اتار چڑھاؤ آتے رہتے ہیں، جنوری میں میں بلندیوں پر تھا لیکن اس کے بعد میں نیچے چلا گیا، میں نے اس تبدیلی سے بہت کچھ سیکھ لیا ہے، میں خوش قسمت ہوں کہ میں نے 20سال کی عمر میںبہت کچھ حاصل کیا،اب میں ان سب چیزوں کا جائزہ لے رہا ہوں۔ مجھے خوشی ہے کہ میں نے سب کچھ سیکھ لیا ہے اور اب میں اپنی بہترین توانائیوں کو استعمال کرسکتا ہوں۔ فیڈرر کے ساتھ تیسرے راؤنڈ کے مقابلے سے پہلے ٹومک کو منگل کو اپنے پہلے راؤنڈ میں ارجینٹیا کے لیونارڈو میئر سے مقابلے کے بارے میں ہوشیار رہنے کی ضرورت ہے۔