پشاورلاشوں کے ہمراہ دھرنا دینے والے افراد اورگورنرکے درمیان مذاکرات کامیاب
منگل کے روز باڑہ میں 19 افراد کی لاشیں سڑک کے کنارے سے ملی تھیں۔ فوٹو : فائل
لاشوں کے ہمراہ گورنرہاؤس کے باہر احتجاج کرنے والے والے افراد نے حکومت سے کامیاب مذاکرات کے بعد دھرنا ختم کرکے میتوں کوآبائی علاقے واپس لے گئے۔
گورنر ہاؤس کے باہر دھرنے میں شامل افراد کے ساتھ کامیاب مذاکرات کے بعد گورنرخیبرپختونخوا مسعود کوثر نے میڈیا سے بات کرتے ہوئے کہا کہ جاں بحق افراد کے لواحقین کو فی کس 4 لاکھ روپے کی امداد دی جائے گی، انہوں نے کہا کہ فاٹا میں سیکیورٹی فورسز دہشت گردی کے خلاف نبرد آزما ہے تاہم واقعے کی پوری تحقیقات کی جائے گی اور حراست میں لئے گئے بے گناہ افراد کو رہا کرنے کے احکامات جاری کر دیئے گئے ہیں۔
واضح رہے کہ منگل کے روز باڑہ کے علاقے عالم گودر سے 19 افراد کی لاشیں سڑک کے کنارے سے ملی تھیں، مقتولین کے لواحقین او سوگواروں نے لاشوں کے ہمراہ گورنر ہاؤس کے سامنے دھرنا دے دیا تھا۔