صباقمر کی بالی ووڈ فلم کی نمائش کی تاریخ آگے بڑھادی گئی

بالی ووڈ میں قدم رکھنے والی پاکستانی اداکارہ صباقمر کی فلم ''ہندی میڈیم'' کی نمائش باکس آفس پر تصادم کے باعث ایک ہفتہ آگے بڑھادی گئی۔

پاکستانی اداکارہ صبا قمر بالی ووڈ اسٹار عرفان خان کے مدمقابل فلم ''ہندی میڈیم'' سے فنی سفر کا آغاز کرنے جارہی ہیں جب کہ دونوں اسٹارز کی فلم 12 مئی کو نمائش کے لیے پیش کی جانی ہے لیکن اب اچانک ہی فلم کی نمائش کا شیڈول تبدیل کردیا گیا ہے۔

اس خبر کو بھی پڑھیں:صبا قمر اپنی پہلی بالی ووڈ فلم کی تشہیر کے لیے بھارت جائیں گی

بھارتی میڈیا رپورٹس کے مطابق عرفان خان اور صباقمر کی فلم 12 مئی کو سنیما گھروں کی زینت بننے والی تھی لیکن اسی روز یش راج فلمز کے بینر تلے بننے والی فلم ''میری پیاری بندو'' اور امیتابھ بچن کی فلم''سرکار 3'' بھی نمائش کے لیے پیش کی جانی ہیں جس کے باعث باکس آفس پر تصادم کا امکان ہے جس پرفلمساز بھوشن کمار نے فلم کی ناکامی کے ڈر سے نمائش کی تاریخ ہی آگے بڑھادی ہے۔

فلم ''ہندی میڈیم'' اب ایک ہفتے بعد 19 مئی کو نمائش کے لیے پیش کی جائے گی جس کے بعد باکس آفس پر اسی روزشردھا کپور اور ارجن کپور کی فلم ''ہاف گرل فرینڈ'' سے تصادم کا بھی خدشہ ہے۔

اس خبر کو بھی پڑھیں:صبا قمر کی پہلی بھارتی فلم پر انگلیاں اٹھ گئیں

واضح رہے کہ ساکیت چوہدری کی ہدایتکاری میں بننے والی فلم''ہندی میڈیم'' میں عرفان خان اورصباقمر نے مرکزی کردار ادا کیا ہے۔