زیڈان زندگی بھر رئیل میڈرڈ میں رہ سکتے ہیں اسپینش کلب صدر پیریز

سابق فرنچ اسٹرائیکر زین الدین زیڈان نے چیمپئنز لیگ ٹرافی فتح سے رئیل میڈرڈ کے صدر فلورنٹینو پیریز کا دل بھی جیت لیا۔

صدر فلورنٹینو پیریز انھوں نے کہا ہے کہ زیڈان زندگی بھر ہمارے کلب سے وابستہ رہ سکتے ہیں ، زیڈان مسلسل دوسرے برس کلب کو چیمپئنز لیگ ٹائٹل جتوانے والے پہلے منیجر بنے ہیں، ٹیم نے یوونٹس کو فائنل میں 4-1 سے شکست دی۔


مقامی ریڈیو سے گفتگو کرتے ہوئے فلورنٹینو نے کہا کہ زیڈان پوری زندگی رئیل میڈرڈ میں رہ سکتے ہیں، کلب کا ہر شائق ان کا انتہائی مشکور ہے، انھوں نے ہماری ٹیم کا معیار بڑھایا ہے، جب وہ 2001 میں ہماری ٹیم میں بطور پلیئر شامل ہوئے تو اس وقت وہ دنیا کے نمبرون کھلاڑی تھے جبکہ اب وہ دنیا کے بہترین کوچ شمار ہورہے ہیں، انھوں نے کلب کیلیے ہر ممکن کاوش کی ہے۔

دوسری جانب زیڈان نے پریس کانفرنس میں کہا کہ میں زندگی بھر رئیل میڈرڈ میں رہنے کی بابت کچھ نہیں کہہ سکتا، لیکن میں کلب صدر کے ان خیالات پر ان کا انتہائی شکرگزار ہوں، میں کلب کا حصہ بن جانے پر خود کو خوش قسمت سمجھتا ہوں۔