سنجے منجریکر بھی حسن علی کی شاندار بولنگ کے گرویدہ

قومی کرکٹ ٹیم کے پیسر حسن علی نے آئی سی سی چیمپئنز ٹرافی میں شاندار کارکردگی سے کرکٹ حلقوں کو داد دینے پر مجبور کر دیا ہے۔

سابق بھارتی کرکٹر سنجے منجریکر نے سری لنکا کے خلاف پیسر کی غیرمعمولی کارکردگی کی تعریف سوشل میڈیا پر کرتے ہوئے کہا کہ "حسن علی خالص میڈ ان پاکستان فاسٹ بولر ہے اور پاکستان کے کرکٹ کلچر کی ایک نیچرل پراڈکٹ ہے۔

انہوں نے ایک اور ٹوئٹ میں لکھا کہ "یہاں تک کہ بیٹنگ میں بھی پاکستان کو میچ جیتنے کیلیے بولرز کی ضرورت پڑتی ہے، ویل ڈن عامر، ویل ڈن سرفراز۔ پاکستان کو جیت پر مبارکباد۔

سابق کرکٹر نے ایک اور ٹوئٹ میں محمد عامر اور جنید خان کی بولنگ کی بھی تعریف کرتے ہوئے کہا کہ جس طرح دونوں بولرز نے سری لنکا کے بلے بازوں پر پریشان رکھا کسی دور میں وسیم اکرم اور وقار یونس اپنے مخالفین کے ساتھ ایسا کیا کرتے تھے مگر اب جنید اور عامر کی صورت میں پاکستان کے پاس بولرز موجود ہیں۔

پاکستانی شائقین نے اس پر سنجے منجریکر کا شکریہ ادا کیا ہے، ایک پاکستانی مداح نے کہا کہ یہ ایک جینیاتی چیز ہے اور بولنگ پاکستانیوں کی جینز میں موجود ہے۔ ایک صارف نے لکھا کہ حسن علی کبھی نہیں تھکتا وہ ایک حیران کن انجن ہے۔