محمود اللہ کی فتح گر سنچری کے پیچھے 6 سالہ بیٹے کا ہاتھ

آئی سی سی چیمپئنز ٹرافی میں نیوزی لینڈ کے خلاف اہم میچ میں سنچری بنا کر بنگلہ دیشی ٹیم کو فتح سے ہمکنار کروانے والے بیٹسمین محمود اللہ نے تھری فیگر اننگز کے بعد اپنے جشن منانے کی وضاحت کردی۔

بنگلادیشی آل راؤنڈر کا کہنا تھا کہ میرے 6 سالہ بیٹے راعد نے چیمپئنز ٹرافی کیلیے روانہ ہونے سے قبل میرے ایک بیٹ پر کچھ لکھا، میرے پوچھنے پر اس نے بتایا کہ میں نے آپ کے بیٹ پر اپنے دستخط کیے ہیں اور آپ اسی بیٹ سے کھیلنا۔ سنچری کی تکمیل پر بیٹ کی جانب اشارہ کرنے کا مقصد اپنے بیٹے کو یہ بتانا تھا کہ میں نے اسی بیٹ سے یہ کارنامہ انجام دیا ہے۔




محمود اللہ اور شکیب الحسن نے 33 رنز پر 4 وکٹیں گرنے کے بعد 224 رنز کی شراکت قائم کرتے ہوئے نہ صرف شاندار سنچریز بنائیں بلکہ ٹیم کو فتح سے بھی ہمکنار کروایا تھا۔

واضح رہے بنگلہ دیشی ٹیم کسی بھی آئی سی سی ایونٹ میں پہلی مرتبہ ناک آﺅٹ مرحلے تک رسائی حاصل کرنے میں کامیاب ہو ئی ہے جہاں ان کا مقابلہ سخت حریف بھارت سے ہو گا۔