کھپرو میں مضر صحت پانی کی فراہمی امراض پھیلنے کا خدشہ

ایڈمنسٹریٹر کھپرو کی غفلت کے باعث شہری مضر صحت اورآلودہ پانی پینے پر مجبور ، تالابوں کے پانی کو صاف نہ کرنے کے باعث پیٹ اور معدے کے امراض پھیلنے لگے۔


تفصیلات کے مطابق نہروں کی بھل صفائی کے بعد ٹی ایم اے کی جانب سے شہریوں کو مضر صحت اورآلودہ پانی فراہم کیا جارہا ہے اور طویل عرصے سے تالابوں میں جراثیم کے خاتمے اورپانی کو صاف کرنے کے لیے پھٹکری اور کلورین کا استعمال نہیں کیا جارہا جسکے باعث شہری مضر صحت پانی پینے پر مجبور ہیں جس کی وجہ سے پیٹ اور معدے سمیت دیگر بیماریوں کے پھیلنے کا خدشہ پیدا ہوگیا ہے۔

ذرائع کے مطابق ایڈمنسٹریٹر کھپرو راج کمار نے پانی کو جراثیم سے پاک کرنے کے لیے کلورین کے استعمال پر پابندی عائد کررکھی ہے۔ شہریوں نے اعلیٰ حکام سے مطالبہ کیا کہ شہریوں کو مضر صحت اور آلودہ پانی فراہم کرنیکا نوٹس لیا جائے۔