اوول ٹیسٹ کے دوران شائقین نے معین علی کا مزاحیہ پورٹریٹ دیوار پر آویزاں کردیا

انگلش شائقین نے آل راؤنڈر معین علی کو 'معینہ لیزا' بنادیا۔

اوول ٹیسٹ کے دوران اسٹیڈیم میں چند شائقین کی جانب سے بالکونی میں ایک تصویر آویزاں کی گئی جس میں مصوری کے شاہکار 'مونالیزا' کے انداز میں معین علی کا پورٹریٹ تھا جس کے اوپر 'معینہ لیزا' لکھا ہوا تھا۔


بہت سے شائقین نے اس تصویر کا مزاحیہ پہلو دیکھا جبکہ انگلینڈ اینڈ ویلز کرکٹ بورڈ نے اس تصویر کو اپنے ٹویٹر اکاؤنٹ سے شیئر بھی کیا تاہم سوشل میڈیا پر شائقین کی اکثریت کو یہ تصویر کافی گراں گزری، ایک نے لکھاکہ آپ معین کو اس انداز میں پیش نہیں کرسکتے، یہ ایک بے وقوفانہ چیز ہے، کچھ نے اسے انگلینڈ کے کرکٹرز اور قومی ہیروز کی توہین قرار دیا، ایک شخص نے لکھا کہ مجھے یہ تصویر انتہائی توہین آمیز دکھائی دے رہی ہے، مجھے تو حیرت اس بات پر ہورہی ہے کہ انگلش بورڈ نے خود یہ تصویر پوسٹ کی ہے، مجھے امید ہے کہ معین علی اس بارے میں باقاعدہ شکایت کریں گے۔

تاہم خود اسپننگ آل راؤنڈر کو بھی اپنے اس پورٹریٹ میں مزاحیہ پہلو ہی دکھائی دیا، اس لیے انھوں نے اپنے بورڈ کی اس پوسٹ کو ہی ری ٹویٹ کرکے اپنے چاہنے والوں تک بھی پہنچادیا۔