بحری قزاقوں کی قید سے رہائی پانیوالوں کے گھروں میں عید کا سماں

صومالیہ میں بحری قزاقوںکی قیدسے رہائی پانے والے پاکستانی عملے کے ارکان کا رہائش گاہوں پر پہنچنے پر ان کا پرتپاک استقبال کیا گیا جس سے ان کے گھروں پر عید کا سا سماں ہوگیا ، پھولوں کے ہار پہنائے گئے جبکہ پتیاں بھی نچھاور کی گئیں۔


عزیز و اقارب ، دوست احباب اور علاقہ مکینوں کی بڑی تعداد بھی اس موقع پر موجود تھی،گھروں کو برقی قمقموں سے سجایا گیا تھا جبکہ پسندیدہ پکوان بھی تیار کیے گئے تھے ، تفصیلات کے مطابق صومالیہ میںبحری جہازایم وی البیڈوکے پاکستانی عملے کو رہا کرالیا گیا جوکہ جمعرات کی شب دبئی سے کراچی پہنچے تھے ، اس موقع پرگورنر ہائوس میں ان کے اعزاز میں تقریب کا اہتمام کیا گیا جوکہ رات گئے تک جاری رہی ، رہائی پانے والوں میں کپتان جاوید سلیم ، چیف آفیسر مجتبیٰ ، ذوالفقار علی ،احسن نوید ،کاشف اسلام ، فقیر محمد اور راحیل انور شامل ہیں۔