ایشین جونیئر اسکواش پاک بھارت فیصلہ کن معرکہ آج ہوگا

16 ویں ایشین جونیئر اسکواش چیمپئن شپ میں پاکستان نے ملائیشیا کو زیر کرتے ہوئے فائنل میں رسائی حاصل کرلی۔

ٹائٹل مقابلے میں روایتی حریف بھارت سے سامنا ہوگا۔ دوسری طرف قومی ویمنز ٹیم چائنیز تائپے کو زیر کرنے کے بعد ساتویں پوزیشن حاصل کرنے میں کامیاب رہی۔ ایونٹ کے بوائز سیمی فائنل میں پاکستان نے ملائیشیا کو 2-0 سے زیر کیا۔




پہلے سنگل میچ میں سید علی مجتبٰی نے عمدہ کھیل کی بدولت ملائیشین سنجے سنگھ چل کو 11-7، 11-5 اور 11-7 سے ہرایا، دوسرے مقابلے میں پاکستان کے طیب اسلم نے محمد عامر کو سخت مقابلے کے بعد 3-2 سے زیر کرتے ہوئے پاکستان کی فائنل میں ٹکٹ بک کروادی۔ چیمپئن شپ کے دوسرے سیمی فائنل میں بھارتی ٹیم نے ہانگ کانگ کو 2-1 سے ہرایا۔ پاکستان اور بھارت کے درمیان فائنل اتوار کو کھیلا جائے گا۔ گرلز ایونٹ میں بھارت اور ہانگ کانگ کی ٹیموں نے فائنل کیلیے کوالیفائی کرلیا۔