پولیس نے ٹارگٹڈ آپریشن کے نام پردرجن سے زائد نشئی پکڑ لیے

پولیس نے بنارس چوک اور پٹھان کالونی میں ٹارگٹڈ آپریشن کے نام پرایک درجن سے زائد نشہ کرنے والوں کوگرفتارکرلیا، پولیس نے آپریشن کے دوران منشیات کے 2 اڈوں کوبھی مسمارکرنے کا دعویٰ کیا ہے۔

تفصیلات کے مطابق پولیس کی بھاری نفری نے پیر آباد کے علاقے بنارس چوک اور پٹھان کالونی سمیت دیگر ملحقہ علاقوں میں ٹارگٹڈآپریشن کے نام پرنشے کی لت میں مبتلاایک درجن سے زائد افرادکوحراست میں لے کر موبائلوں میں ڈال کر ایس پی اورنگی ٹاؤن کے آفس لے گئے۔




حراست میں لیے جانیوالوں نے بتایا کہ وہ نشے کے عادی ہیں اور پولیس انھیں زبردستی موبائلوں میں ڈال کر لے جا رہی ہے ، پولیس کے اس ٹارگٹڈ آپریشن سے بخوبی اندازہ لگایا جا سکتا ہے کہ اورنگی ٹاؤن پولیس جرائم پیشہ عناصر کی گرفتاری میں کس قدر سنجیدہ ہے۔