اداکارہ میرا کا بالی ووڈ کی شاہکار فلم ’’پاکیزہ‘‘ کو دوبارہ بنانے کا ارادہ

اداکارہ میرا بالی ووڈ کی مشہور شاہکار فلم پاکیزہ کا ری میک بنانے کا ارادہ رکھتی ہیں اب دیکھنا یہ ہے کہ ان کی یہ خواہش کب پوری ہوتی ہے۔

میرا جنہوں نے 10 سال قبل مہیش بھٹ کی فلم ''نظر'' کے ذریعے بالی ووڈ انڈسٹری میں قدم رکھا لیکن کوئی خاطر خواہ کامیابی حاصل نہ کرپائیں مگر اب انہوں نے جس خواہش کا اظہارکیا وہ بھی کسی دیوانے کے خواب سے کم نہیں ، موصوفہ نے نہ صرف بالی ووڈ کی شاہکار فلم ''پاکیزہ'' کا ری میک بنانے کا ارادہ کیا ہے بلکہ مینا کماری کے کردار"صاحِب جان" کو بھی نبھانے کی خواہش کا اظہارکیا ہے، اداکارہ میرا نے اس سلسلے میں فلم پاکیزہ کے ہدایت کار کمال امروہوی کے بیٹے تاج دار سے بھی ملاقات کی اور ان سے اس فلم کے ری میک کو بنانے کے لئے اجازت طلب کی۔


میرا نے اس سلسلے میں ایک بھارتی اخبار کو انٹرویو دیتے ہوئے کہا کہ مجھے اس فلم میں مینا کماری کا کردار بے حد پسند آیا اور میں نے بالی ووڈ میں اسی چاہ کے تحت قدم رکھا تھا کہ میں ایک نہ ایک دن اسی کردار کو نبھاؤں گی۔

کمال امروہوی کے بیٹے تاجدار کا میرا کے اس ارادے سے متعلق کہنا تھا کہ وہ اس وقت ایک ایسی بچی کی طرح ہیں جو ایک بہت بڑا خواب دیکھ رہی ہے، پاکیزہ فلم بنانا اتنا آسان نہیں ہے، یہ ایک چیلنج ہے کیونکہ اب اگر پاکیزہ کو دوبارہ بنایا جائے تو اس کے سیٹس، لباس، زیورات پرماضی کے مقابلے میں کئی گنا زیادہ اخراجات آئیں گے اور فلم کے ڈائیلاگ اور ویسے ہی مناظرکو دوبارہ عکس بند کرنا بھی آسان نہ ہو گا۔

تاجدار کا کہنا تھا کہ پاکیزہ بالی ووڈ میں مدر انڈیا، مغل اعظم اور شعلے کے درجے کی فلم ہے، انہوں نے کہا کہ میرا کو اس فلم کو بنانے کے لئے ایک اچھے ڈائریکٹڑ اور میوزک کمپوزر کا بھی انتخاب کرنا ہو گا۔