بینظیر بھٹو قتل کیس مشرف کے اثاثے بحال کرنے کی درخواست خارج

انسداد دہشت گردی کی عدالت نے بے نظیر بھٹو قتل کیس میں سابق صدر پرویز مشرف کے منجمد اثاثوں کی بحالی کے لیے دائر درخواست خارج کردی۔

راولپنڈی کی انسداد دہشتگردی کی خصوصی عدالت نے بینظیر قتل کیس کی سماعت کے دوران پرویز مشرف کی اہلیہ صہبا مشرف کی جانب سے ثبوتوں کی عدم فراہمی پر ان کی درخواست خارج کردی۔


واضح رہے کہ عدالت نے متعدد مرتبہ نوٹس جاری ہونے کے باوجود عدم پیشی پر پرویز مشرف کو اشتہاری قرار دیتے ہوئے ان کے اثاثے منجمد کرنے کا حکم دیا تھا۔ فیصلے کے خلاف ان کی اہلیہ صہبا مشرف نے درخواست دائر کی تھی، ان کی جانب سے متعلقہ ثبوت فراہم نہ کئے جانے پر عدالت نے معاملہ نمٹاتے ہوئے درخواست خارج کردی ۔