لاہور میں آئندہ الیکشن خود مانیٹر کروں گا صدرآصف زرداری 

صدر آصف زرداری سے پیپلز پارٹی لاہورڈویژن کے تنظیمی عہدیداروں، ٹکٹ ہولڈرز اور ارکان اسمبلی نے یہاں بلاول ہاؤس میں ملاقات کی۔

صدر نے پارٹی رہنماؤں کو ہدایت کی کہ وہ لاہور میں بھرپور فوکس کریں اور کارکنوں کے ساتھ رابطوں کو بڑھایا جائے، لاہور میں آئندہ الیکشن میں خود مانیٹر کرونگا، پیپلزپارٹی حمزہ شہباز شریف کے حلقے سمیت تمام سیٹوں پر مضبوط امیداوار سامنے لائے گی، اس مرتبہ لاہور میں مقابلہ ون ٹوون نہیں ہوگا بلکہ تین چار پارٹیوںکے امیدوار مد مقابل ہونگے۔ انھوں نے کہاکہ وہ آئندہ الیکشن میں پیپلزپارٹی کی کامیابی کیلیے تمام اضلاع کے دورے کریں گے۔




اجلاس میں پیپلزپارٹی پنجاب کے صدر منظور وٹو، اپوزیشن لیڈر راجہ ریاض، ثمینہ خالد گھرکی، چئیرمین متروکہ وقف املاک بورڈ آصف ہاشمی، اسلم گل، تنویر کائرہ، نوید چوہدری، اورنگزیب برکی، عزیزالرحمن چن، قاسم ضیاء، فاروق یوسف گھرکی، بشری اعتزاز، فائزہ ملک اور دیگر نے شرکت کی۔ صدر مملکت کو لاہور کے انتخابی حلقوں کے متعلق تفیصلی بریفنگ دی گئی۔ صدر نے کہا پیپلزپارٹی بھرپور تیاری سے انتخابات میں جائیگی، لاہور میں خود پیپلزپارٹی کے امیدواروں پر نظر رکھوں گا، ہم یہاں پر حمزہ شہباز شریف کیخلاف بھی مضبوط امیدوار لائیں گے۔