کے پی کے وسائل کو پنجاب پر حملے کے بجائے عوام پر خرچ کرنا چاہیے، مریم نواز

 لاہور: وزیراعلی پنجاب مریم نواز شریف نے ہمت کارڈ منصوبے کا افتتاح کردیا۔

لاہور افتتاحی تقریب سے خطاب کرتے ہوئے وزیر اعلی پنجاب مریم نواز شریف نے کہا ہے کہ آج میرا ایک اور خواب ہوا، منصوبے کے تحت خصوصی افراد کو سہولیات کی فراہمی یقینی بنائی جائے گی، 65 ہزار افراد کو ہمت کارڈ ملیں گے، جس کے تحت 3 ماہ میں انہیں ساڑھے 10 ہزار روپے دیے جائیں گے، خصوصی افراد کو قومی دھارے میں شامل کرنا ہماری ترجیح ہے۔

وزیراعلی کے پی علی امین کے پنجاب میں احتجاج پر ردعمل میں انہوں نے کہا کہ جس طرح کے پی ہمارا ہے اس طرح پنجاب بھی آپ کا ہے، کے پی میں روٹی پھر 25 روپے کی ہوگئی، میں پہلے پاکستانی بعد میں پنجابی ہوں، یہ ذہنی مفلوج ہیں جو نہ خود کام کرتے ہیں نہ کسی کو کرنے دیتے ہیں، جن کا کام ہی انتشار اور جلاؤ گھیراؤ ہے، اس سے عوامی خدمت میں خلل پڑتا ہے۔

ان کا کہنا تھا کہ کے پی کے وسائل کو دوسرے صوبے پر حملہ کرنے کے بجائے عوام کی خدمت پر خرچ کرنا چاہیے، پنجاب پر حملہ کرنے کےلیے جو پیسہ خرچ کر رہے ہیں یہ کے پی کے عوام کی امانت ہے، پنجاب پولیس پر چلائے گئے شیلز قانون کے نفاذ کے لیے تھے،  امن و امان خراب کرنے کےلیے نہیں۔

انہوں نے مزید کہا کہ پنجاب میں ایک سال پہلے روٹی کی قیمت 25 روپے تھی آج 12 روپے ہے، ن لیگ جب بھی حکومت میں آتی ہے ملک کا سوچتی ہے۔