غیرقانونی وصولیاں امپورٹرز کو مقدمات درج کرانے میں مشکلات

درخواستیں دینے کے باوجود تھانوں میں مقدمات درج نہ ہونے پر قانون دانوں کی خدمات لے لیں

Business Reporter August 05, 2018

بعض جہازراں فرمز،نجی ٹرمینلز کی جانب سے اضافی ڈیمریج وڈیٹنشن وصولیوں کی شکایت ہے۔ فوٹو: فائل

بعض جہازراں کمپنیوں اورنجی کنٹینرٹرمینلز کی جانب سے غیرقانونی طور پر اضافی ڈیمریج وڈیٹنشن کی وصولیوں کے خلاف مقدمہ درج میں مشکلات پر متاثرہ درآمدکنندگان نے قانونی مشیران کی خدمات حاصل کرلی ہیں۔

متاثرہ درآمدکنندگان کا کہنا ہے کہ وہ پاکستان کے رائج قوانین کے مطابق مختلف ممالک سے درآمدی کنسائمنٹس منگواتے ہیں لیکن کنسائمنٹس کے پاکستان پہنچتے ہی کچھ شپنگ کمپنیوں کے ایجنٹس نجی کنٹینرٹرمینلز اور بعض متعلقہ کسٹم حکام غیرقانونی طور پر ڈیمریج وڈیٹینشن اور اضافی ڈیمریج وڈیٹنشن چارجز کی ادائیگیوں کا جواز بنانے کے لیے تاخیری حربے استعمال کرتے ہیں جس سے نہ صرف درآمدکنندگان کی کاروباری لاگت میں نمایاں اضافہ ہوتا ہے بلکہ ان کے درآمدہ مال کے پہلے سے طے شدہ معاہدے کے مطابق مقررہ وقت میں ترسیل بھی نہیں ہوپاتی ہے۔

درآمدکنندگان کا موقف ہے کہ بعض شپنگ کمپنیوں، نجی کنٹینرٹرمینل اورمتعلقہ کسٹم حکام کی ملکی بھگت سے درآمدکنندگان کو سالانہ 15ارب روپے کا کاروباری نقصان پہنچایا جارہا ہے۔ ان منفی سرگرمیوں سے دلبرداشتہ مختلف درآمدکنندگان نے مذکورہ کمپنیوں، ان کے ایجنٹس اورنجی کنٹینرٹرمینل انتظامیہ کے خلاف مختلف پولیس اسٹیشنز میں 13 اپیلیں جمع کروا دی ہیں تاکہ مقدمات درج کر کے قانونی کارروائی کا آغاز ممکن ہوسکے۔

درآمدکنندگان کی جانب سے پولیس اسٹیشنز میں پینل کوڈ 407، 409، 420، 427، 506 اور دیگر شقوں کے تحت رپورٹس درج کروائی ہیں تا کہ ان کمپنیوں کو غیرقانونی طور پر اضافی چارجز کا مطالبہ کرنے اور بلیک میل کرنے سے روکا جا سکے۔

درآمدکنندگان کا موقف ہے کہ اگردرآمدکنندہ اورشپنگ کمپنیوں کے درمیان معاہدے کے بعد متعلقہ بل آف لیڈنگ پراضافی ڈیمریج وڈیٹنشن کی باقاعدہ تحریر ی معاہدہ نہ کیا گیا ہو تو ایس آر او 1220(I)/ 2015 کے تحت شپنگ کمپنیاں اضافی ڈیمرج اور ڈیٹینشن چارجز کا مطالبہ نہیں کر سکتی ہیں اور پاکستان کسٹمز کی جانب سے متعلقہ درآمدکنندہ کو اگر ''ڈیلے اینڈ ڈیٹینشن سرٹیفکیٹ'' جاری نہ کیا گیا ہو توکسٹمز ایکٹ مجریہ 1969 کے سیکشن 14 اے میں بھی اس امرکی تائید کی گئی ہے کہ نجی کنٹینر ٹرمینل اضافی ڈیمرج اور ڈیٹینشن کا مطالبہ نہیں کر سکتی ہے۔ ذرائع نے بتایا کہ درآمدکنندگان کی جانب سے پولیس اسٹیشنز میں 13 درخواستیں جمع کرانے کے باوجود ایف آئی آر درج نہ ہوسکی۔