کورنگی اغوا کار بچے کی آنکھوں میں ایلفی ڈال کر سڑک کنارے چھوڑ گئے

عوامی کالونی میں لوگوں کو بچہ ملا تو وہ اسے فوری طور پر اسپتال لے گئے

Staff Reporter January 06, 2020

عوامی کالونی میں لوگوں کو بچہ ملا تو وہ اسے فوری طور پر اسپتال لے گئے . فوٹو : اسکرین گریب

شہر قائد کے علاقے کورنگی میں نامعلوم ملزمان نے سفاکیت کی انتہا کردی، مغوی 8 سالہ بچے کی آنکھوں میں ایلفی ڈال کر اسے چھوڑ کر فرار ہوگئے۔

ایکسپریس کے مطابق اتوار کو رات گئے کورنگی کے سندھ گورنمنٹ اسپتال میں ایک 8 سالہ بچے کو لایا گیا جس کی آنکھوں میں نامعلوم افراد نے ایلفی ڈال دی تھی، بچے کو لانے والے افراد نے بتایا کہ عوامی کالونی کے علاقے میں نامعلوم افراد بچے کو چھوڑ گئے تھے اور اس کی آنکھوں میں ایلفی ڈالی ہوئی تھی۔

پولیس حکام کا کہنا ہے کہ فوری طور پر ڈاکٹروں نے بچے کو طبی امداد فراہم کی اور اس کی آنکھوں سے ایلفی صاف کردی گئی تاہم بچے کے وارثوں کے بارے میں فوری طور پر معلوم نہیں ہوسکا جس کے بعد بچے کو صارم برنی ویلفیئر ٹرسٹ کے حوالے کردیا گیا۔

بعد ازاں ٹی وی چینلز پر خبر نشر ہونے کے بعد بچے کے ورثا نے پولیس سے رابطہ کیا تو انھوں نے بتایا کہ آٹھ سالہ حنان اتوار کی صبح آٹھ بجے گھر سے نکلا تھا جس کے بعد وہ گھر واپس نہیں آیا اور اس بارے میں اہل خانہ نے زمان ٹاؤن پولیس کو بھی آگاہ کردیا تھا ، پولیس نے فوری طور پر ویلفیئر ٹرسٹ سے بچہ واپس بلایا اور والدین کے حوالے کردیا۔