ورلڈکپ منتظمین نے پلان بی پر ہونٹ بند کرلیے

انعقاد کا امکان کم ہے، اگر ہوا بھی تو شائقین نہیں آ سکیں گے،منسٹر

Sports Desk April 17, 2020

ایڈیلیڈ اوول کی بھارتی ٹیم کوہوٹل قرنطینہ سینٹر بنانے کی پیشکش۔ فوٹو: فائل

آسٹریلیا میں رواں برس شیڈول ورلڈ ٹی 20 ورلڈ کپ پر غیریقینی کے بادل گہرے ہونے لگے جب کہ منتظمین نے پلان بی سے متعلق ہونٹ سختی سے بند کرلیے۔

دنیا بھر میں کورونا وائرس کی تباہ کاریوں سے مستقبل قریب کے مزید ایونٹس کا انعقاد غیریقینی دکھائی دینے لگا ہے، ان میں آسٹریلیا میں 18 اکتوبر سے 15 نومبر تک شیڈول ٹوئنٹی 20 ورلڈ کپ بھی شامل ہے، منتظمین نے فی الحال اس حوالے سے ہونٹ سختی سے بند کررکھے ہیں، ذرائع کا کہنا ہے کہ کرکٹ آسٹریلیا ایونٹ کی میزبانی رواں برس نہ کرپانے کی صورت میں دیگر آپشنز پر غور کررہا ہے۔ آئندہ برس ٹی 20 ورلڈ کپ کا اگلا ایڈیشن بھارت میں شیڈول ہے۔

وکٹورین وزیر کھیل مارٹن پاکولا نے رواں برس ایونٹ کے مقررہ وقت پر انعقاد کے حوالے سے مزید شبہات ظاہر کردیے ہیں، انھوں نے کہاکہ میں سمجھتا ہوں کہ کامن ویلتھ لیول پر چیف میڈیکل آفیسر کی جانب سے شدید مخالفت ہوسکتی ہے، ایونٹ صرف اسی صورت میں ہی ممکن ہے جب آسٹریلیا میں کورونا کا مکمل خاتمہ ہوجائے، فی الحال یہ چیز کافی مشکل دکھائی دے رہی ہے، اگر ایونٹ ہوا بھی تو اس میں شائقین کی شرکت کا امکان نہ ہونے کے برابر ہی ہوگا۔

دوسری جانب کرکٹ آسٹریلیا کو رواں برس کے آخر میں بھارت سے ہوم سیریز کی فکر بھی کھائے جا رہی ہے، اگر 4 ٹیسٹ میچز کی سیریز نہ ہوئی تو صرف ٹی وی ریونیو کی مد میں بورڈ کو 300 ملین ڈالر کا نقصان ہوگا، اسی صورتحال کے پیش نظر ساؤتھ آسٹریلین کرکٹ چیف کیتھ بریڈشا نے بورڈ کو پیشکش کی کہ وہ بھارتی ٹیم کیلیے اپنے نوتعمیر شدہ ایڈیلیڈ اوول ہوٹل کو قرنطینہ میں تبدیل کرنے کو تیار ہیں۔

آسٹریلوی حکومت کی جانب سے باہر سے آنے والوں کیلیے 14 روزہ آئسولیشن کی سختی ہے، بریڈشا نے کہاکہ اگر یہ پابندی برقرار رہی تو ویرات کوہلی اینڈ کمپنی کیلیے ہمارا ہوٹل حاضر ہوگا جہاں پر وہ قرنطینہ کے دوران پریکٹس میچ تک کھیل سکیں گے۔