امارات اور اسرائیل کے درمیان معاہدے پر سعودی عرب کا مؤقف سامنے آگیا

اسرائیل کی توسیع پسندی کی یک طرفہ پالیسیاں بلا جواز اور دوریاستی حل کے لیے نقصان دہ ہیں، سعودی وزیر خارجہ

ویب ڈیسک August 19, 2020

سعودی وزیر خارجہ نے برلن میں صحافیوں سے بات کرتے ہوئے پہلی مرتبہ اسرائیل امارات معاہدے پر مؤقف ظاہر کیا ہے(فوٹو، فائل)

سعودی عرب نے امارات اور اسرائیل کے مابین ہونے والے معاہدے پر پہلا باضابطہ ردعمل ظاہر کردیا ہے۔

سعودی خبر رساں ادارے کے مطابق جرمنی کے شہر برلن میں صحافیوں سے بات کرتے ہوئے سعودی عرب کے وزیر خارجہ فیصل بن فرحان نے کہا کہ اسرائیل کی آبادکاری اور توسیع پسندی کی یک طرفہ پالیسیاں بلا جواز اور دوریاستی حل کے لیے نقصان دہ ہیں۔ انہوں ںے کہا کہ ایک بار فلسطینیوں اور اسرائیلیوں کے درمیان ہوجائے تو سب کچھ ممکن ہے۔

واضح رہے متحدہ عرب امارات کی جانب سے اسرائیل کوتسلیم کئے جانے کےبعد پہلی مرتبہ سعودی عرب کاموقف سامنے آیا ہے۔ انہوں نے مزید کہا کہ مملکت عرب امن منصوبے کے تحت خطے میں امن کیلئے پُرعزم ہے۔ اسرائیل کی فلسطینی علاقوں میں آبادکاریوں کےحوالے سے یک طرفہ کارروائیاں امن کی کوششیں تباہ کرسکتی ہیں۔