بھارت میں جنونی ہندوؤں کا دلت نوجوان پر بہیمانہ تشدد ویڈیو وائرل

اونچی ذات سے تعلق رکھنے والے 4 جنونی ہندوؤں نے دلت نوجوان کو مار مار کر بے ہوش کردیا

ویب ڈیسک July 13, 2021

تشدد کا نشانہ بننے والے ابھے کی ماں نے تھانے میں ایف آئی آر درج کرادی، فوٹو: فائل

بھارت میں اونچی ذات کے جنونی ہندوؤں نے نچلی ذات کے دلت نوجوان کو ڈنڈوں سے بہیمانہ تشدد کا نشانہ بنایا جس کی ویڈیو وائرل ہوگئی۔

بھارتی میڈیا کے مطابق ریاست اترپردیش میں 18 سالہ دلت نوجوان کو اونچی ذات سے تعلق رکھنے والے چار جنونی ہندوؤں نے ڈنڈوں، لاتوں اور گھونسوں سے بے رحمانہ طور پر پیٹا جس کی ویڈیو وائرل ہوگئی۔

فیروز آباد کے پولیس اسٹیشن میں تشدد کا نشانہ بننے والے نوجوان ابھے کی والدہ ممتا دیوی نے ایف آئی آر درج کرائی ہے جس میں الزام عائد کیا گیا ہے کہ ہرنام نامی شخص نشے کی حالت میں تیز رفتار ٹریکٹر چلا رہا تھا،ہمارا خاندان حادثے سے بال بال بچا، جب میرے بیٹے نے ہرنام کو اس طرح کرنے سے روکا تو وہ گالیاں بکنے لگا اور سنگین نتائج کی دھمکیاں دیتے ہوئے چلا گیا۔

دوسرے روز جب میرا بیٹا اپنی سائیکل پر مارکیٹ جا رہا تھا تو ہرنام کے بیٹے اور بھتیجوں وریندر، اوبائے، شیوام اور ستیام نے اسے پکڑ کو تشدد کا نشانہ بنایا، ملزمان مغلظات بکتے رہے اور ویڈیو بھی بنائی تاکہ پورے گاؤں میں بدنام کر سکیں۔

ابھے کی والدہ کا مزید کہنا تھا کہ جب میں وہاں پہنچی تو میرا بیٹا بے ہوش پڑا تھا، ہم اسے اسپتال لے کر گئے جہاں اسے طبی امداد دی گئی۔ بااثر ملزمان اب بھی ہمیں ڈرا دھمکا رہے ہیں۔