عمران اشرف بلقیس ایدھی کے بھی پسندیدہ اداکار

بلقیس صاحبہ آپ کی دعاؤں میں رہنا آپ کو پسند آنا میرے لیےایوارڈ ہے، عمران اشرف

ویب ڈیسک July 15, 2021

بلقیس ایدھی نے بتایا کہ انہیں عمران اشرف کا ڈراما ’’رقص بسمل‘‘ بہت زیادہ پسند ہے فوٹوفائل

اداکار عمران اشرف ممتاز سماجی کارکن اور ایدھی فاؤنڈیشن کی روح رواں بلقیس ایدھی کے بھی پسندیدہ اداکار ہیں۔

گزشتہ روز عمران اشرف نے اپنے سوشل میڈیا اکاؤنٹ پر ایک ویڈیو شیئر کی جس میں ایک خاتون بلقیس ایدھی کا انٹرویو کررہی تھیں۔ انٹرویو کے دوران بلقیس ایدھی نے عمران اشرف کے بارے میں کہا کہ عمران ان کے پسندیدہ اداکار ہیں اور خاص طور پر ڈراما سیریل ''رقص بسمل'' میں ان کا کردار ''موسیٰ'' انہیں بے حد پسند ہے۔

بلقیس ایدھی نے بتایا کہ انہیں عمران اشرف کا ڈراما ''رقص بسمل'' اتنا زیادہ پسند ہے کہ وہ ڈرامے کی آخری قسط بار بار دیکھ رہی ہیں۔ میزبان نے بلقیس آپا سے کہا کہ آپ انہیں دعائیں دے دیں جس پر بلقیس ایدھی نے کہا میں نے دعا کی جب ہی تو آخری قسط میں موسیٰ اور زوہرا ایک دوسرے سے ملے۔

عمران اشرف نے یہ ویڈیو اپنے انسٹاگرام اکاؤنٹ پر شیئر کرتے ہوئے لکھا ''جو لوگ انسانیت کی خدمت میں سب سے آگے ہیں مسز عبدالستار ایدھی بلقیس صاحبہ آپ کی دعاؤں میں رہنا آپ کو پسند آنا ایوارڈ ہے بلکہ کرم ہے۔ اللہ کے پسندیدہ لوگوں میں سے ہیں آپ جو انسانیت کی خدمت کرتے ہیں اللہ آپ کو صحت دے تندرستی دے آمین۔''

[instagram-post url="https://www.instagram.com/p/CRTzm7NFT1I/"]

واضح رہے کہ عمران اشرف کا نجی چینل سے نشر کیا جانے والا ڈراما ''رقص بسمل'' حال ہی میں ختم ہوا ہے۔ یہ ڈراما پاکستان کے مقبول ترین ڈراموں میں سے ایک تھا جس نے پہلی ہی قسط سے ناظرین کو اپنے سحر میں جکڑا ہوا تھا۔ ''رقص بسمل'' کی آخری قسط لوگوں میں بے حد مقبول ہوئی تھی یہاں تک کہ ٹوئٹر پر دو دن تک ''رقص بسمل'' ٹاپ ٹرینڈنگ میں رہاتھا۔ اس ڈرامے میں عمران اشرف کے ساتھ اداکارہ سارہ خان نے مرکزی کردار ادا کیا تھا۔