پڈعیدن کے قریب ریلوے لائن بم دھماکے سے اڑادی گئی

دھماکے کی جگہ پر ڈیوائس بیٹری، ریموٹ کنٹرول اور دیگر اشیاء مل گئی ہیں، بم ڈسپوزل اسکواڈ

ویب ڈیسک October 06, 2021

دھماکے کی جگہ پر ڈیوائس بیٹری، ریموٹ کنٹرول اور دیگر اشیاء مل گئی ہیں، بم ڈسپوزل اسکواڈ۔ فوٹو:فائل

کوٹ لالو ریلوے اسٹیشن کے قریب ریلوے لائن کو ریموٹ کنٹرول دھماکے سے اڑایا گیا۔

ایکسپریس نیوز کے مطابق پڈعیدن ریلوے پولیس تھانے کی حدود کوٹ لالو ریلوے اسٹیشن کے قریب زور دار دھماکے کی آواز سنی گئی، دھماکا اس قدر شدید تھا کہ اس کی آواز میلوں دور سنائی دی، واقعے کی اطلاع ملتے ہی بم ڈسپوزل اسکواڈ اور پولیس کی ٹیمیں جائے وقوعہ پر پہنچ گئیں اور علاقے کو سیل کردیا گیا۔

بم ڈسپوزل انچارج نوید وسطڑو نے بتایا کہ ریلوے ٹریک کو ریمورٹ کنٹرول بم کے ساتھ اڑایا گیا ہے، دھماکے کی جگہ پر ڈیوائس بیٹری، ریموٹ کنٹرول اور دیگر اشیاء مل گئی ہیں۔ پولیس کے مطابق سی ٹی ڈی کے جانب سے دہشت گردی ایکٹ کے تحت مقدمہ درج کیا جائے گا۔

دوسری جانب ریلوے انتظامیہ کا کہنا ہے کہ خیبر میل ایکسپریس، گرین لائن ایکسپریس اور فرید ایکسپریس کو مختلف اسٹیشنوں پر روکا گیا ہے، ٹریک کی بحالی کا کام جاری ہے۔