رانا ٹونگا کا وزیراعظم کو خط پریانتھا کو انصاف دلانے کی کوششوں کی تعریف

عمران خان ملک کے متنازع مسائل کو احتیاط سے حل کر رہے ہیں، سابق سری لنکن کپتان

ویب ڈیسک December 14, 2021

عمران خان ملک کے متنازع مسائل کو احتیاط سے حل کر رہے ہیں، سابق سری لنکن کپتان - فوٹو:فائل

ISLAMABAD: سری لنکا کے سابق کرکٹ کپتان رانا ٹونگا نے سیالکوٹ واقعے پر وزیراعظم عمران خان کے نام خط لکھ کر پریانتھا کمارا کو انصاف دلانے کی کوششوں کی تعریف کردی۔

سابق سری لنکن کپتان رانا ٹونگا نے وزیراعظم کو خط تحریر کیا ہے جس میں انہوں نے حکومت پاکستان کی پریانتھا کمارا کو انصاف دلانے کی کوششوں کو سراہا ہے۔ رانا ٹونگا نے خط میں لکھا کہ یہ سمجھنا ضروری ہے کہ یہ کارروائیاں آبادی کے ایک چھوٹے سے حصے کی طرف سے کی جاتی ہیں، چند لوگوں کے اعمال پر پوری قوم خاص طور پر پاک سری لنکا تعلقات کو نہیں پرکھا جانا چاہیے۔

Dear Hon. Prime Minister @ImranKhanPTI,

Thank you for all your efforts in bringing justice for the crime committed against Priyantha Diyawadanage, and for the continued support and commitment toward his family.

Best Regards,

Your friend and colleague,

Arjuna pic.twitter.com/WwcvOWaIjK
— Arjuna Ranatunga (@ArjunaRanatunga) December 13, 2021

رانا ٹونگا نے کہا کہ ہماری دونوں قوموں کے درمیان رشتہ ہمیشہ مضبوطی اور یکجہتی کا رہا ہے، جب سری لنکا مشکل کا شکار تھا تو یہ پاکستان ہی تھا جس نے ہمارے فوجیوں کا ساتھ دیا اور 1996ء میں دیگر ممالک نے کرکٹ ورلڈ کپ میں شرکت کے لیے سری لنکا آنے سے انکار کر دیا تھا، کرکٹ ہو یا سیاست، آپ ہمیشہ چیلنجز کا سامنا کرنے میں غیر متزلزل رہے ہیں، جب سے آپ پاکستان کے وزیراعظم بنے ہیں، آپ ملک کے متنازع مسائل کو احتیاط سے حل کر رہے ہیں۔

انہوں نے خط میں مزید لکھا کہ امید ہے کہ آپ پاکستانی کمیونٹی کے چند گمراہ افراد کو یہ سکھا سکیں گے کہ ہر ایک کے ساتھ وہی عزت اور وقار کا برتاؤ کریں جس کے تمام انسان مستحق ہیں، میں ایک بار پھر اس بھیانک جرم کے مرتکب تمام افراد کو ڈھونڈنے اور انصاف کے کٹہرے میں لانے میں آپ کی کوششوں کے لیے آپ کا شکریہ ادا کرنا چاہوں گا، ہم سری لنکن بحیثیت قوم آنجہانی کمارا خاندان کے مستقبل کے بارے میں آپ کے اظہار کردہ جذبات کی صحیح معنوں میں قدر کرتے ہیں۔