بچوں سے محبت میں اندھے نہ ہوں نظر ضرور رکھیں آفریدی کا والدین کے لیے اہم پیغام

ہر بچے کا سال میں 2 بار ڈوپ ٹیسٹ لازمی کرانا چاہیے، آفریدی

ویب ڈیسک January 09, 2022

بچیوں کی بیرونی سرگرمیوں پر نظر رکھنے کی اشد ضرورت ہے، شاہد آفریدی (فائل فوٹو)

قومی ٹیم کے سابق کپتان اور آل راؤنڈر شاہد خان آفریدی نے بچوں میں منشیات کے بڑھتے ہوئے استعمال پر تشویش کا اظہار کرتے ہوئے والدین سے اپیل کی ہے کہ وہ بچوں کی محبت میں اندھے نہ ہوں اور نظر ضرور رکھیں۔

شاہد آفریدی نے یوٹیوب پر شیئر کی گئی ویڈیو میں والدین اور اساتذہ کو مخاطب کرتے ہوئے کہا کہ یہ ویڈیو آپ کے لیے ہے کیونکہ اسکول، کالج یونیورسٹی کے ٹیچرز کا کردار بھی والدین کی طرح ہوتا ہے۔

شاہد آفریدی نے کہا کہ اسکول اور یونیورسٹی کی سطح پر منشیات استعمال کے بہت سارے کیسز سُننے اور دیکھنے کو ملے، بہت سی فیملیز نے پولیس اسٹیشن جاکر اپنے بچوں کے حوالے سے پریشانی کا اظہار بھی کیا ہے۔

سابق کپتان کا کہنا تھا کہ یوتھ میں منشیات کا استعمال بہت تیزی سے بڑھ رہا ہے، جو ہم سب کے لیے بہت بڑی پریشانی ہے، ہم اپنی اولاد سے محبت ضرور کرتے ہیں مگر یہ اس قدر نہیں ہونی چاہیے کہ ہم اولاد کی محبت میں اندھے ہوجائیں اور اُن کی گھر سے باہر کی (بیرونی) سرگرمیوں پر نظر نہ رکھ سکیں۔

شاہد آفریدی نے مزید کہا کہ ہر بچے کا سال میں 2 بار ڈوپ ٹیسٹ لازمی ہونا چاہیے تاکہ دیر نہ ہوا اور والدین کو پچھتاوے کا سامنا نہ کرنا پڑے۔

[ytembed videoid="PHlsHluAyzs"]