سات ماہ کے دوران 11 بار پٹرولیم مصنوعات مہنگی ہوئیں

بجٹ کے بعد اب تک پٹرول میں39روپے،ہائی اسپیڈ ڈیزل میں33روپے لیٹر اضافہ ہوا

ثاقب ورک January 18, 2022

بجٹ کے بعد اب تک پٹرول میں39روپے،ہائی اسپیڈ ڈیزل میں33روپے لیٹر اضافہ ہوا۔ فوٹو: فائل

FAISALABAD: وفاقی حکومت نے 7 ماہ میں گیارویں بار پٹرولیم مصنوعات مہنگی کیں جب کہ 15جون2021 کے بعد سے اب تک پٹرولیم مصنوعات 39 روپے27پیسے فی لیٹر تک مہنگی کی گئیں۔

حکومت نے جون دو ہزار اکیس میں وفاقی بجٹ پیش کرنے کے بعد سے اب تک پٹرول کی قیمت میں فی لٹر39روپے 27پیسے،ہائی اسپیڈ ڈیزل میں33روپے 86پیسے،لائٹ ڈیزل میں 36 روپے89پیسے اور مٹی کے تیل کی قیمت میں فی لیٹر36روپے 48 پیسے کا اضافہ کیا۔

سات ماہ میں پٹرول کی فی لیٹر قیمت ایک سو آٹھ روپے چھپن پیسے سے ایک سو سنتالیس روپے تریاسی پیسے،ہائی اسپیڈ ڈیزل کی قیمت ایک سو دس روپے چھہتر پیسے سے ایک سو چوالیس روپے باسٹھ پیسے،مٹی کے تیل کی قیمت اسی روپے سے ایک سو سولہ روپے اڑتالیس پیسے جبکہ لائٹ ڈیزل کی فی لٹر قیمت ستتر روپے پیسنٹھ پیسے سے بڑھ کر ایک سو چودہ روپے چون پیسے فی لٹر کردی گئی ہے۔