ہریتھک روشن کی دوسری شادی کی خبریں سوشل میڈیا پر گرم

48 سالہ ہریتھک روشن کی پہلی شادی 2000 میں ہوئی تھی جو 14 سال چلی اور ان کے دو بچے بھی ہیں

ویب ڈیسک January 30, 2022

48 سالہ ہریتھک روشن نے پہلی شادی 2000 میں کی تھی ؛ فوٹو: فائل

بالی ووڈ اسٹار ہریتھک روشن کو نوجوان لڑکی کا ہاتھ تھامے ریسٹورینٹ سے باہر آتے دیکھا گیا ہے جس کے بعد جوڑی سے متعلق چہ مہ گوئیاں شروع ہوگئی ہیں۔

بھارتی میڈیا کے مطابق مداح اپنے پسندیدہ اداکار کی نئی آنے والی فلم وکرم ودھا کے بے چین تھے لیکن ہریتھک روشن کو پردہ اسکرین پر ایکشن میں دیکھنے کے بجائے ریسٹورینٹ کے باہر ایک نامعلوم لڑکی کے ساتھ دیکھا گیا ہے۔

سوشل میڈیا پر وائرل ہونے والی تصاویر میں دیکھا جا سکتا ہے کہ 48 سالہ کرش اسٹار ایک لڑکی کا ہاتھ تھامے ریسٹورینٹ سے باہر نکلتے ہیں اور گاڑی میں ساتھ بیٹھ کر چلے جاتے ہیں۔

ہریتھک روشن کے ساتھ موجود لڑکی نے ماسک پہنا ہوا ہے جس کے باعث وہ پہچانی نہ جاسکیں تاہم بعد میں تصدیق ہوگئی کہ یہ موسیقار اور اداکارہ صبا آزاد ہیں۔

خبریں گرم ہیں کہ دونوں کئی ماہ سے ایک دوسرے سے مل رہے ہیں لیکن پہلی بار کسی عوامی مقام پر فوٹوگرافرز نے ان کی ملاقات کو عکس بند کیا ہے۔

ہریتھک روشن نے پہلی شادی سوزان خان کے ساتھ چار سال کی رفاقت کے بعد 2000 میں کی تھی اور 2014 میں دونوں کے درمیان طلاق ہوگئی تھی۔ ہریتھک کے دو بچے بھی ہیں۔

دوسری جانب 2008 میں شوبز انڈسٹری میں انٹری دینی والی صبا آزاد اب اداکارہ اور موسیقارہ کی حیثیت سے اپنی جگہ بنا چکی ہیں۔ 2013 میں اداکار نصیر الدین شاہ کے بیٹے عماد شاہ کے ساتھ ان کے تعلقات خبریں گرم تھیں۔

ہریتھک روشن اور صبا آزاد کی جانب سے ان تصاویر اور خبروں پر مکمل خاموشی ہے۔