سیکیورٹی فورسز کی شمالی وزیرستان میں کارروائی بھاری تعداد میں گولہ بارود برآمد

مواصلاتی آلات اور سیکڑوں متعدد کیلیبر راوٴنڈز بھی برآمد کیے گئے، آئی ایس پی آر

ویب ڈیسک February 03, 2022

برآمد کیے گئے ہتھیاروں اور گولہ بارود میں سب مشین گنز، ہینڈ گرنیڈ اور آر پی جی راکٹ شامل ہے (فوٹو فائل)

ANKARA: سیکیورٹی فورسز نے شمالی وزیرستان کے ضلع غلام خان خیل میں کارروائی کر کے بھاری تعداد میں گولہ بارود اور دیگر جدید اسلحہ برآمد کرلیا۔

پاک فوج کے شعبۂ تعلقاتِ عامہ (آئی ایس پی آر) کی جانب سے جاری بیان میں بتایا گیا ہے کہ سیکیورٹی فورسز نے دہشت گردوں کے چھپنے کی اطلاع پر شمالی وزیرستان کے ضلع غلام خان خیل میں انٹیلی جنس آپریشن کیا۔

آئی ایس پی آر کے مطابق سرچنگ کے دوران دہشت گردوں کے ٹھکانے سے بھاری مقدار میں اسلحہ، گولہ بارود اور دیسی ساختہ بم برآمد ہوئے۔

ترجمان پاک فوج کے مطابق برآمد کیے گئے ہتھیاروں اور گولہ بارود میں سب مشین گنز، ہینڈ گرنیڈ، آرپی جی -7 راکٹ، آئی ای ڈیز اور اس کی تیاری میں استعمال ہونے والا مواد، مواصلاتی آلات اور سیکڑوں متعدد کیلیبر راوٴنڈز بھی شامل ہیں۔