جہانگیر ترین طبیعت ناساز ہونے پر لندن روانہ

جہانگیر ترین ایک ہفتہ نجی اسپتال میں زیر علاج رہے اور چند روز قبل ہی گھر منتقل ہوئے تھے، عون چوہدری

ویب ڈیسک February 26, 2022

جہانگیر ترین لندن میں اپنا چیک آپ کروائیں گے، عون چوہدری۔ فوٹو:فائل

تحریک انصاف کے ناراض رہنما جہانگیر ترین طبیعت خراب ہونے پر لندن روانہ ہوگئے۔

ایکسپریس نیوز کے مطابق تحریک انصاف کے ناراض رہنما اور شوگر اسکینڈل میں نامزد ملزم جہانگیر ترین طبیعت ناساز ہونے پر لندن روانہ ہوگئے ہیں۔ ذرائع نے بتایا کہ جہانگیر ترین صبح ساڑھے 10 بجے خصوصی طیارے پر لندن روانہ ہوئے۔

دوسری جانب جہانگیر ترین کے قریبی ساتھی اور پارٹی رہنما عون چوہدری نے تصدیق کرتے ہوئے بتایا کہ جہانگیر ترین ایک ہفتے سے لاہور کے نجی اسپتال میں زیر علاج تھے، اور کچھ روز قبل طبعیت بہتر ہونے ہر وہ اسپتال سے گھر منتقل ہوئے، تاہم اب وہ طبی چیک اپ کے لئے لندن روانہ ہوئے ہیں جہاں ایک ہفتہ رہیں گے۔

عون چوہدری کا کہنا تھا کہ لندن روانگی سے قبل جہانگیر ترین نے اپنے ساتھیوں کے لئے پیغام دیتے ہوئے کہا کہ متحد اور رابطے میں رہنا ہے۔