پاکستان کے لیے آخری لمحے اور آخری گیند تک لڑوں گا وزیراعظم

وزیراعظم نے وفاقی کابینہ اور پارلیمانی کمیٹی کا اجلاس طلب کرلیا، جمعے کی شام قوم سے خطاب کا بھی اعلان

ویب ڈیسک April 07, 2022

کابینہ کے خصوصی اجلاس میں وزرا اور مشیر شرکت کریں گے جبکہ وزرائے مملکت اور معاونین کابینہ ڈویژن سے آن لائن شریک ہوں گے (فائل فوٹو)

وزیراعظم عمران خان نے سپریم کورٹ کے فیصلے کے بعد قوم کے نام جاری پیغام میں کہا ہے کہ پاکستان کے لیے آخری لمحے ، آخری گیند تک لڑوں گا اور جمعے کی شام قوم سے خطاب کروں گا۔

سماجی رابطے کی ویب سائٹ پر اپنے پیغام میں عمران خان نے کہا کہ میں نے جمعے کو کابینہ اور پارلیمانی پارٹی کے اجلاس طلب کیے ہیں، جس کے بعد قوم سے خطاب کروں گا۔

قبل ازیں وزیر مملکت اطلاعات و نشریات فرخ حبیب اور وفاقی وزیر اطلاعات و قانون فواد چوہدری نے بھی وزیراعظم عمران خان کے قوم سے خطاب سے متعلق بیانات جاری کیے۔

دونوں وزرا نے بتایا کہ وزیراعظم کی زیر صدارت وفاقی کابینہ اور پارلیمانی کمیٹی کا اجلاس طلب کیا، جس کے بعد وہ رات کو قوم سے انتہائی اہم خطاب کریں گے۔

کابینہ کا خصوصی اجلاس صبح گیارہ بجے طلب

وزیراعظم عمران خان نے وفاقی کابینہ کا خصوصی اجلاس وزیراعظم ہاؤس میں جمعے کی صبح 11 بجے طلب کرلیا، جس میں وفاقی وزراء اور وزیراعظم کے مشیر شرکت کریں گے جبکہ وزرائے مملکت اور معاونین خصوصی کابینہ ڈویژن سے اجلاس میں آن لائن شرکت کریں گے۔

مزید پڑھیں: سپریم کورٹ کا جو بھی فیصلہ آئے گا اُسے قبول کریں گے، وزیراعظم

دریں اثنا سپریم کورٹ کے فیصلے کے بعد بنی گالہ میں وزیراعظم عمران خان کی زیر صدارت پارٹی رہنماؤں کا ہنگامی اجلاس ہوا جس میں سپریم کورٹ کے فیصلے اور مستقبل کی صورت حال پر غور کیا جارہا ہے۔

ذرائع کے مطابق اجلاس میں آئندہ کی حکمتِ عملی کے حوالے سے لائحہ عمل بھی مرتب کیا گیا۔ اس اہم میٹنگ میں پی ٹی آئی کی سینئر قیادت اور قانونی ماہرین بھی شریک تھے۔

میں نے کل وفاقی کابینہ اور اپنی پارلیمانی پارٹی کے اجلاس طلب کئے ہیں جبکہ شام میں قوم سے مخاطب ہوں گا۔ قوم کیلئے میرا پیغام ہے کہ میں ہمیشہ پاکستان کیلئے لڑا ہوں اور آخری لمحے آخری گیند تک مقابلہ کرتا رہوں گا۔

- Imran Khan (@ImranKhanPTI) April 7, 2022

پی ٹی آئی ذرائع کے مطابق حکومت نے موجودہ صورت حال میں مختلف آپشنز پر غور بھی کیا، جبکہ پارلیمانی کمیٹی اور کابینہ کا اجلاس بلانے پر حتمی اتفاق کیا گیا۔

اس سے قبل وزیراعظم عمران خان کی قانونی ٹیم سے ملاقات ہوئی جس میں انہوں نے سپریم کورٹ کے کسی بھی فیصلے کو تسلیم کرنے کا اعلان کیا تھا۔

یہ بھی پڑھیں: سپریم کورٹ نے ڈپٹی اسپیکر کی رولنگ غیر آئینی قرار دے کر قومی اسمبلی بحال کردی

وزیراعظم نے قانونی ٹیم سے گفتگو کرتے ہوئے کہا تھا پی ٹی آئی نئے انتخابات کے لئے تیار ہے، ہم غیر ملکی سازش کو کسی طور پر کامیاب نہیں ہونے دیں گے۔

واضح رہے کہ سپریم کورٹ آف پاکستان کے لاجر بینچ نے ڈپٹی اسپیکر رولنگ ازخود نوٹس کا مختصر اور متفقہ فیصلہ جاری کیا، جس میں ڈپٹی اسپیکر کی رولنگ کو غیر آئینی قرار دے کر قومی اسمبلی کو تین اپریل کی حیثیت میں بحال کرنے اور عوم اعتماد کی ووٹنگ کے لیے 9 اپریل کو اجلاس بلانے کا حکم دیا گیا ہے۔