پھلوں کی نمائش کا نیا ریکارڈ 70000 پونڈ وزنی کیلوں کا ڈسپلے

شکاگو کی سپرمارکیٹ کے باہر کیلوں کی اتنی بڑی تعداد کا اعتراف گنیز بک آف ورلڈ ریکارڈ نے بھی کیا ہے

ویب ڈیسک June 09, 2022

شکاگو میں 70 ہزار پونڈ وزنی کیلوں کا ڈسپلے گنیز بک آف ورلڈ ریکارڈ میں شامل۔ فوٹو: یوپی آئی ویب سائٹ

کراچی: پھلوں کی نمائش میں غیرمعمولی ڈسپلے کا ایک نیا اعزاز امریکا میں قائم ہوا ہے جہاں 70 ہزارپونڈ وزنی کیلوں کو ایک جگہ نمائش کے لیے پیش کیا گیا ہے۔

پھلوں کی پیداوار اور فروخت کے لیے مشہور ادارے ڈیل مونٹے اور مشہور سپر اسٹور کمپنی جویل اوسکو نے ویسٹ مونٹ کے شہر میں اپنی ایک شاخ کے باہر 70 ہزار پونڈ وزنی کیلے رکھے ہیں جسے ایک ہی قسم کے پھلوں کا سب سے بڑا مجموعی ڈسپلے قرار دیاگیا ہے۔ اگر کلوگرام کی بات کی جائے تو اس کا وزن 31700 کلوگرام بنتا ہے۔

گنیز بک آف ورلڈ ریکارڈ نے بھی اس کی تصدیق کرتے ہوئے عملے اور انتظامیہ کو سند اور مبارک باد دی ہے۔ اس سے قبل برازیل کی ایک کمپنی 2016 میں 41 ہزار پونڈ وزنی مختلف پھلے ایک جگہ جمع کئے تھے اور ان سے رنگ برنگی اسٹال بنایا تھا۔

تاہم اس بار جویل اوسکو کے باہر رکھے اس ڈسپلے کو لوگ دور دور سے دیکھنے آئے اور اخباری نمائیندوں نے بھی اس پر خبریں نشر کی ہیں۔ اعزاز کی تصدیق کے بعد تمام کیلے مختلف خیراتی اداروں میں تقسیم کئے گئے ہیں۔