پالتو کتے نے چولہا جلا کر گھر کو نذرِآتش کردیا ویڈیو وائرل

میسوری کے ایک گھر میں چولہے پر رکھے کھانے کی تلاش میں اچانک گیس کھل گئی اور بھڑک اٹھی

ویب ڈیسک June 16, 2022

کینساس شہر میں کتے نے باورچی خانے کے چولہے پر رکھے کھانے کی کوشش میں چولہا جلادیا جس سے پورے گھر کو شدید نقصان پہنچا ہے۔ فوٹو: ڈیلی مِرر

پالتو کتے نے بھوک سے تنگ آکر گھر کا چولہا کھول دیا جس سے ہولناک آگ بھڑک اٹھی جس سے گھر کو نقصان بھی پہنچا ہے۔

یہ واقعی امریکی ریاست میسوری کے شہر کینساس میں پیش آیا جب ایک کتے نے چولہے پر رکھی اشیاء کو کھانے کی کوشش کی تو اچانک اس سے گیس کی چابی کھل گئی جس سے لگنے والی آگ نے گھر کو بھی اپنی لپیٹ میں لے لیا۔

یہ گھر رِس لیک میں واقع تھا اور آگ لگنے پر فائر بریگیڈ نے فوری طور پر جائے وقوعہ پر پہنچ کر پہلے دو کتوں کو بچایا اور اس کے بعد گھر کی آگ کو ٹھنڈا کیا۔ اس وقت گھر میں پالتو کتوں کے علاوہ کوئی اور موجود نہ تھا۔

اس کے بعد سیکیورٹی کیمروں کی محفوظ کردہ ویڈیو دیکھی گئی تو معلوم ہوا کہ چولہے پر فرائی پین رکھا تھا۔ جب کتے نے اسے کھانے کی کوشش کی تو اس سے غیرارادی طور پر گیس کی چابی کھل گئی۔ لگ بھگ آٹھ منٹ تک کھانا گرم ہوا اور اس کے بعد جل کر بھڑک اٹھا جس سے اطراف میں آگ لگی اور اس نے پورے کمرے کو اپنی لپیٹ میں لے لیا۔ اس کی وجہ یہ ہے کہ چکنائیوں کے باعث کھانا گرم ہوا اور اس نے آگ پکڑلی تھی۔

اگرچہ اس واقعہ میں کتوں کو کوئی نقصان نہیں پہنچا تاہم آگ کی شدت نے گھر کو ہزاروں ڈالر کا نقصان پہنچایا ہے۔