عمران خان اور دیگر پی ٹی آئی رہنماؤں کیخلاف سپریم کورٹ میں ایک اور درخواست

پی ٹی آئی قیادت اور دیگر عہدیداروں کی جانب سے عدلیہ ، فوج اور الیکشن کمیشن کے خلاف بیانات جاری ہیں، درخواست میں مؤقف

ویب ڈیسک June 28, 2022

عدالت عظمیٰ اداروں کے خلاف بیان بازی کا نوٹس لے، درخواست گزار (فوٹو فائل)

سابق وزیر اعظم عمران خان اور تحریک انصاف کے دیگر رہنماؤں کو ملکی اداروں کے خلاف بیان بازی سے روکنے کے لیے سپریم کورٹ میں ایک اور درخواست دائر کردی گئی ہے۔

قوسین فیصل ایڈووکیٹ کی جانب سے دائر کی گئی درخواست میں مؤقف اختیار کیا گیا ہے کہ حکومت کے خاتمے کے بعد عمران خان اور پی ٹی آئی کے دیگر رہنما قومی اداروں کے خلاف مسلسل بیانات دے رہے ہیں۔ عمران خان اپنے بیانات کے ذریعے قومی اداروں اور ریاست کو کمزور کر رہے ہیں ۔ادارے کمزور ہوں گے تو غیر ملکی سازش کامیاب ہو سکتی ہے۔

درخواست میں کہا گیا ہے کہ عمران خان اور پی ٹی آئی کے دیگر عہدیداروں کی جانب سے عدلیہ ، فوج اور الیکشن کمیشن کے خلاف بیانات جاری ہیں۔ اپنی تقاریر میں عمران خان نے فوج کو سیاست میں شامل ہونے اور ان کا ساتھ دینے کا کہا۔

درخواست گزار نے عدالت سے استدعا کی ہے کہ سپریم کورٹ عمران خان کے بیانات کا نوٹس لیتے ہوئے کمیشن تشکیل دے جو ا ن بیانات کا جائزہ لے کر ہونے والے نقصانات کا بھی جائزہ لے۔ عدالت عمران خان سمیت دیگر رہنماؤں کو قومی اداروں کے خلاف بیانات دینے اور میڈیا پر نشر کرنے سے روکنے کے احکامات دے۔

درخواست میں عمران خان ، فواد چودھری، شیریں مزاری، الیکشن کمیشن ، پی ٹی اے ، پیمرا اور ایف آئی اے کو فریق بنایا گیاہے۔