امریکا کے شاپنگ مال میں فائرنگ سے 3 افراد ہلاک 2 زخمی

شاپنگ کے لیے آنے والے ایک نوجوان نے حملہ آور کو گولی مار کر ہلاک کردیا

ویب ڈیسک July 18, 2022

خریداری کیلیے آنے والے 22 سالہ نوجوان نے حملہ آور کو گولی مار کر ہلاک کردیا، فوٹو: رائٹرز

امریکی ریاست انڈیانا میں ایک مصروف شاپنگ مال میں مسلح شخص نے اندھا دھند فائرنگ کردی جس کے نتیجے میں 3 افراد ہلاک اور 2 زخمی ہوگئے۔

عالمی خبر رساں ادارے کے مطابق امریکی ریاست انڈیانا کے شہر انڈیاناپولس کے گرین ووڈ پارک مال میں فائرنگ کے واقعے میں 3 افراد ہلاک اور 2 زخمی ہوگئے۔

فائرنگ کے وقت شاپنگ مال میں موجود ایک نوجوان نے اپنے لائسنس یافتہ پستول سے مسلح حملہ آور کو اسلحہ پھینکنے کو کہا تاہم انکار پر حملہ آور کو گولی مار کر ہلاک کردیا۔

انڈیانا پولیس کے ترجمان کا کہنا ہے کہ 22 سالہ نوجوان نے حاضر دماغی کا مظاہرہ کیا اور اپنے قانونی اسلحے سے حملہ آور کو مزید قتل عام کرنے سے روک دیا۔ حملہ آور کی شناخت کا عمل جاری ہے۔

واضح رہے کہ امریکا میں فائرنگ کے واقعات میں اضافہ دیکھا گیا ہے اور گزشتہ دو ماہ میں ایسے واقعات میں ہلاک ہونے والوں کی تعداد 50 سے تجاوز کرگئی ہے جن میں اسکول کے معصوم بچے بھی شامل ہیں۔