ملک دشمن عناصر یوم آزادی پر دہشت گردی کرنا چاہتے ہیں وزیر اعلیٰ بلوچستان

عوام صوبے بھر میں آزادی کی تقریبات بھرپور طریقے سے منائیں گے، عبدالقدوس بزنجو

ویب ڈیسک August 13, 2022

عبدالقدوس بزنجو۔ : فوٹو : فائل

وزیراعلیٰ بلوچستان عبدالقدوس بزنجو نے کہا ہے کہ ملک دشمن عناصر یومِ آزادی کے موقع پر دہشت گردی کے ذریعے صوبے میں اپنی موجودگی ثابت کرنا چاہتے ہیں۔

ایکسپریس نیوز کے مطابق وزیراعلیٰ بلوچستان کی آئی جی بلوچستان سے ملاقات ہوئی، جس میں یوم آزادی کے حوالے سے سیکیورٹی انتظامات پر تبادلہ خیال کیا گیا جبکہ پولیس سربراہ نے عبدالقدوس بزنجو کو بریفنگ بھی دی۔

آئی جی سے گفتگو کرتے ہوئے وزیراعلیٰ نے کہا کہ دہشت گرد عناصر معصوم غریب اور بے گناہ افراد کو یوم آزادی پر ٹارگٹ کر کے اپنے مذموم مقاصد کو پورا کرکے اپنی موجودگی ثابت کرنا چاہتے ہیں۔

انہوں نے کہا کہ دشمن کی ہر سازش کو عوام کی حمایت سے ناکام بنائیں گے، ہماری سیکورٹی فورسز ملک دشمن عناصر سے نمٹنے کی بھرپور صلاحیت رکھتی ہیں، عوام صوبے بھر میں آزادی کی تقریبات بھرپور طریقے سے منانے کے لیے تیار ہیں۔