سعودی عرب کی میٹرو میں ریکارڈ 2.2 ملین حاجیوں کا سفر

ریاض: سعودی عرب کی میٹرو ٹرین سروس ’المشاعر ٹرین‘ میں ریکارڈ 2.2 ملین عازمین حج نے سفر کیا۔

حج اور عمرہ پر آنے والے غیر ملکی زائرین کو بہترین سفری سہولیات، آرام دہ اور محفوظ ذرائع آمدورفت فراہم کرنے کے لیے چلائی جانے والی المشاعر ٹرین نے ریکارڈ زائرین کو ان کی منزل مقصود تک پہنچایا۔

سعودی ریلویز کی جانب سے سوشل میڈیا پر جاری ہونے والے ایک بیان میں کہا گیا ہے کہ اس سال حج سیزن کے دوران 2.2 ملین حجاج کرام نے المشاعر ٹرین میں سفر کیا۔

حکام کا کہنا تھا کہ مکہ مکرمہ میں عرفات، مزدلفہ اور منیٰ کے درمیان میٹرو ٹرین کے 9 اسٹیشنز نے عازمین حج کی میزبانی کی، جبکہ دوران حج میٹرو ٹرین کے 2206 ٹرپس چلائے گئے۔

حج کے پہلے دن 29 ہزار حاجیوں کو ان کی منزل مقصود تک پہنچایا گیا، جبکہ 2 لاکھ 92 ہزار سے زائد عازمین حج کو منیٰ سے عرفات تک کی سفری سہولت فراہم کی گئی۔

المشاعر ٹرین نے دوران حج عرفات سے مزدلفہ تک 3 لاکھ 5 ہزار اور مزدلفہ سے منیٰ تک 3 لاکھ 83 ہزار سے زائد حاجیوں کو مناسک حج کی ادائیگی کے لیے منتقل کیا۔

علاوہ ازیں ایام تشریق کے دوران منیٰ 1، منیٰ 2 اور مزدلفہ 3 سے منیٰ 3 کے اسٹیشن تک 1.2 ملین حاجیوں نے میٹرو کی سہولت سے فائدہ اٹھایا، جس کی وجہ سے حاجیوں کو جمرات کے پُل تک پہنچنے میں کوئی مشکل پیش نہ آئی۔