بنگلا دیش میں جماعت اسلامی پر پابندی لگانے کا فیصلہ
کوٹہ سسٹم کیخلاف پُر تشدد احتجاج کو ہوا دینے میں جماعت اسلامی اور اس کی طلبہ تنظیم ملوث تھی، حکومتی وزیر
بنگلا دیش میں سرکاری ملازمتوں میں کوٹہ سسٹم کیخلاف ہونے والے احتجاجی مظاہروں کے بعد حکومت نے جماعت اسلامی اور طلبہ تنظیم اسلامی چھاترو شبر پر پابندی لگانے کا فیصلہ کرلیا۔
مقامی میڈیا کے مطابق بنگلادیشی وزیر قانون انیس الحق نے منگل کے روز اعلان کیا کہ جماعت اسلامی پر پابندی کے فیصلے کو حتمی شکل دینے کے لیے آج وزیر داخلہ سے مشاورت ہوگی جس کے بعد کل ایک ایگزیکٹو آرڈر کے ذریعے جماعت اسلامی بنگلادیش اور اسلامی چھترو شبر پر پابندی عائد کردی جائے گی۔
مزید پڑھیں: بنگلادیش؛ پُرتشدد مظاہروں میں ہلاکتوں پر آج قومی یومِ سوگ منایا گیا
انکا کہنا تھا کہ ملک میں سرکاری ملازمتوں میں کوٹہ سسٹم کیخلاف حالیہ پر تشدد احتجاج کو ہوا دینے میں جماعت اسلامی اور اس کی طلبہ تنظیم اسلامی چھاترو شبر ملوث تھی۔
دوسری جانب جماعت اسلامی بنگلادیش کے رہنماؤں نے حکومتی فیصلے کو غیر قانونی، غیر آئینی اور ماورائے عدالت قرار دیا ہے۔
خیال رہے کہ گزشتہ دنوں ہونے والے پُرتشدد احتجاج میں 200 سے زائد افراد جاں بحق اور سیکڑوں زخمی ہوئے تھے جبکہ مظاہرین کے خلاف کریک ڈاؤن میں ہزاروں افراد کو گرفتار کیا گیا تھا۔