علم ِفلکیات کی روشنی میں آپ کا یہ ہفتہ

پیر 5تا 11 اگست 2024

August 04, 2024

پیر 5تا 11 اگست 2024

برج حمل
سیارہ مریخ ، 21 مارچ تا 20 اپریل
آپ کا سیارہ مشتری کے ساتھ ہے لیکن دوسرے سیارے ان دونوں کے ساتھ خراب نظر بنارہے ہیں۔ ایسے وقت میں عطارد، زہرہ اور چاند کی باہم ملاقات اس ہفتے کے ابتدائی تین ایام کو اہم بنارہی ہے۔ آپ کی صحت متاثر ہوسکتی ہے، ملازمت جاسکتی ہے یا کوئی الزام لگ سکتا ہے۔ شریکِ حیات کے ساتھ بگاڑ نظر آرہا ہے۔

برج ثور
سیارہ زہرہ ، 21اپریل تا 20 مئی
آپ کی سوچ سمجھ متاثر ہوسکتی ہے۔ کوئی غلط فیصلہ ہوسکتا ہے کوئی پرانا معاملہ تازہ ہوسکتا ہے۔ پرانے تعلق میں پھر سے روح پھونکی جاسکتی ہے۔ اولاد کی صحت پر توجہ دیں۔ آپ کے اور آپ کے ساتھی کے مابین تلخی کا امکان موجود ہے۔ غیرمتوقی مالی فائدہ ہوسکتا ہے، جس کا تعلق کسی اجنبی یا بیرون ملک سے ہوسکتا ہے۔

برج جوزا
سیارہ عطارد ، 21مئی تا 21 جون
آپ کا سیارہ عطارد جو کہ سمجھ بوجھ، تحریروتقریر اور سفر کا نمائندہ ہونے کے ساتھ آلاتِ رابطہ (موبائل، لیپ ٹاپ اور گاڑی) سے منسلک ہے، راجع ہوچکا ہے۔ کچھ دباؤ آپ کا سکون خراب کرسکتا ہے۔ کوئی پرانا مہربان آپ کے ساتھ لین دین کی وجہ سے بگاڑ لاسکتا ہے یا دباؤ ڈال سکتا ہے۔ ایسے وقت میں اپنے آرام اور وقت پر کھانے کو مت بھولیں۔

برج سرطان
سیارہ قمر ، 22جون تا 23 جولائی
آپ کا سیارہ چاند پیر اور منگل کو عطارد اور زہرہ سے مل رہا ہے۔ ایسے میں مشتری، مریخ و زحل کی خراب نظرات مسائل کی نشان دہی کررہی ہیں۔ سفر سے گریز بہتر ہے۔ کسی بھی قسم کے وعدے یا معاہدے کو کرنے سے پہلے مشورہ اور نظرثانی کو بالکل نہ بھولیں۔ راستے میں سواری کو مسئلہ درپیش ہوسکتا ہے۔ صدقہ لازم دیں!

برج اسد
سیارہ شمس ، 24جولائی تا 23 اگست
آپ کی توانائی کا گراف خاصا بلند ہے۔ امید کا خانہ بھی روشن ہے لیکن راجع عطارد کو مریخ سے تربیع اور زحل سے مقابلہ ہے۔ کوئی پرانا لین دین آپ کی کسی امید کو مکمل یا جزوی طور پر متاثر کرسکتا ہے۔ کھانے پینے میں محتاط رہیں۔ الرجی ہوسکتی ہے یا معدہ متاثر ہوسکتا ہے۔ کچھ بھی کہنے سے پہلے اپنے الفاظ پر خود ضرور غور کرلیں۔

برج سنبلہ
سیارہ عطارد ، 24 اگست تا 23 ستمبر
آپ کا سیارہ اپنے طالع اور شرفی برج میں ہے لیکن راجع ہوکے مریخ و زحل کی نظر میں ہے۔ اعصابی نظام متاثر ہوسکتا ہے۔ جسم میں درد اور حواس ردہم کھوسکتے ہیں آرام کریں اور گوشت کو جزوِغذا ضرور بنائیں۔ آپ کی آمدن میں لازمی ایک خاطر خواہ اضافہ ہونے کی امید ہے۔ اسی رفتار سے خرچہ بھی ہورہا ہے۔

برج میزان
سیارہ زہرہ ، 24 ستمبر تا 23اکتوبر
بیرون ملک سفر یا امیگریشن کے لیے کی گئی کاوشیں کسی وجہ سے تعطل کا شکار ہوسکتی ہیں۔ ہوسکتا ہے پرواز منسوخ ہوجائے۔ ویزے کی کاغذی کارروائی میں کوئی سقم سامنے آسکتا ہے۔ ان سے متعلق امور میں دہری توجہ کی ضرورت ہے۔ کسی وجہ سے اسپتال جانا پڑسکتا ہے۔ اپنی صحت کا خیال رکھیں۔ خود پر تنقید سے آپ تنہائی کا شکار ہوسکتے ہیں۔

برج عقرب
سیارہ پلوٹو ، 24 اکتوبر تا 22 نومبر
شریکِ حیات کے ساتھ کسی بات پر تلخی کا اندیشہ ہے۔ آپ کا سکون اس عرصے میں متاثر ہوسکتا ہے۔ شریکِ حیات کا لہجہ آپ کو پریشان کرسکتا ہے۔ دوستوں سے وابستہ امیدیں کچھ پوری ہوں گی اور کچھ میں کوئی تعطل پیدا ہوسکتا ہے۔ اولاد یا محبوب سے متعلق کوئی فکر لاحق ہوسکتی ہے۔ آپ کی لاٹری جیسی کوئی آمدن ہوسکتی ہے۔

برج قوس
سیارہ مشتری ، 23 نومبرتا 22 دسمبر
آپ کے کاروباری شریک اور شریکِ حیات کو آپ سے کچھ شکایات ہوسکتی ہیں۔ آپ کی شراکت داری کا سلسلہ بڑھ سکتا ہے، لیکن کئی افراد سے اشتراکی معاہدہ نہایت سمجھ داری سے کریں، کیوںکہ یہاں غلطی کا اندیشہ موجود ہے۔ آپ کی ملازمت اور کیریئر پر کوئی سوال اٹھ سکتا ہے۔ کوئی الجھن پیدا ہوسکتی ہے۔ کسی سے تلخ ہونے کا اندیشہ ہے، صبر سے کام لیں۔

برج جدی
سیارہ زحل ، 23 دسمبر تا 20 جنوری
یہ ہفتہ آپ کے لیے اہم تبدیلیاں لاسکتا ہے۔ ذہن پر کچھ دباؤ اور سوچوں کی ایک کے بعد ایک قطار آپ کو گہری فکر میں مبتلا کرسکتی ہے۔ نیند ٹھیک سے پوری کریں اور مساج اور چہل قدمی ضرور کریں۔ اعصابی نظام میں کوئی خرابی ہوسکتی ہے۔ کرائے یا اعزازی مکان کے سلسلے میں کوئی الجھن لاحق ہوسکتی ہے۔

برج دلو
سیارہ یورنیس ، 21 جنوری تا 19 فروری
زمین جائیداد، وراثتی امور سے منسلک کوئی کیس ہوسکتا ہے یا کاغذی خرابی اور دردِسر کی وجہ بن سکتا ہے۔ پرانا لین دین آپ کی مصروفیت ہوسکتا ہے۔ اس تناؤ کی وجہ سے آپ کی صحت کا متاثر ہونا لازمی ہے۔ زودہضم غذا ضرور استعمال کریں۔ الرجی ہوسکتی ہے۔ معدہ یا گردے سے متعلق کوئی بیماری ہوسکتی ہے۔

برج حوت
سیارہ نیپچون ، 20 فروری تا 20 مارچ
اس ہفتے آپ کا اپنے شریکِ حیات کے ساتھ کسی معاملے میں اختلافِ رائے ہوسکتا ہے۔ اسے نرم لہجے میں سمجھائیں اور مسئلہ نرمی سے حل کی کوشش کریں۔ اسے حل ہونے کچھ وقت لگے گا لیکن اس دوران کوشش کریں کہ یہ تلخی فاصلوں کو جنم نہ دے۔ تحمل اور برداشت ہوسکتا ہے آپ کے اعصاب کا امتحان لے لہٰذا اس کے لیے خود کو تیار رکھیں!